საუდის არაბეთში 550-ზე მეტი ადამიანი დაიღუპა ჰაჯის, ტრადიციული მუსლიმური პილიგრიმობის დროს წმინდა ქალაქ მექაში. სასიკვდილო შემთხვევათა უმრავლესობა გამოიწვია 50 გრადუს ცელსიუსზე მაღალმა სიცხემ. წმინდა ადგილებში და მათთან მისასვლელ რიგებში მომლოცველებს ჩრდილში შეჩერების საშუალება არ ჰქონდათ. დაღუპულთაგან 300-ზე მეტი ეგვიპტელია. სიცხის მსხვერპლთა შორის ასევე არიან ტუნისის, იორდანიის, ირანის, სენეგალის, ინდონეზიისა და სხვა ქვეყნების მოქალაქეები. დაახლოებით 2700 მომლოცველი მოათავსეს საავადმყოფოებში. საუდის არაბეთის ჯანდაცვის სამინისტრომ ურჩია მომლოცველებს, მოერიდონ მზეს, სვან ბევრი წყალი და, თუ ეს შესაძლებელია, ჩრდილში დარჩნენ ყველაზე ცხელ საათებში. თუმცა, ჰაჯის მრავალი რიტუალი, როგორებიცაა ქააბის წმინდა ქვისთვის შემოვლა მექაში და სავალდებულო ასვლა არაფატის მთაზე, მუსლიმებისგან მოითხოვს დღის განმავლობაში მცხუნვარე მზეში ყოფნას. წელს 1,8 მილიონზე მეტმა მორწმუნემ შეასრულა ჰაჯი მექაში. შარშან, როდესაც ჰაჯი ასევე ივნისს დაემთხვა, მინიმუმ 240 სიკვდილი აღირიცხა სიცხისა და დეჰიდრაციის გამო. რეგიონში ჩატარებული კვლევები აჩვენებს, რომ ზაფხულის ტემპერატურები, რომლებიც თვით საუდის არაბეთისთვისაც კი ანომალიურია, დაკავშირებულია კლიმატის გლობალურ ცვლილებასთან. ექსპერტების აზრით, მექის რაიონში საშუალო ტემპერატურა ყოველ ათწლეულში სტაბილურად იზრდება 0,4 გრადუსით. ჰაჯი ერთ-ერთია „ისლამის ხუთი სვეტიდან“, ანუ მორწმუნის მოვალეობებიდან. იგი მოიცავს მექაში მომლოცველობას, ალ-ჰარამის მეჩეთის მოხილვას, იქ მდებარე ქააბის წმინდა ქვის გარშემო შემოვლას, არაფატის მთაზე ასვლას, ეშმაკის სიმბოლურ ჩაქოლვას და სხვა რიტუალებს. ითვლება, რომ ყოველი მუსლიმი ვალდებულია ცხოვრებაში ერთხელ მაინც შეასრულოს ჰაჯი, თუ მას აქვს ასეთი შესაძლებლობა. ჰაჯის დრო გამოითვლება მთვარის მუსლიმური კალენდრის მიხედვით. წელს და შარშან ის ივნისზე მოდიოდა. ჰაჯის კვირა ივნისის დასაწყისს დაემთხვევა გაისადაც, 2025 წელს. ...