წელს ჰაჯის დროს 1000-ზე მეტი ადამიანი დაიღუპა საუდის არაბეთში პილიგრიმობის პერიოდში. უდაბნოში მდებარე სამეფოში მოგზაურობისას მორწმუნეებს უკიდურესად მაღალ ტემპერატურებთან გამკლავება უხდებოდათ, განაცხადეს 23 ივნისს ოფიციალურმა პირებმა. დაღუპულთა ნახევარზე მეტი ეგვიპტიდან იყო, თქვა ხელისუფლების ორმა წარმომადგენელმა კაიროში. ლიცენზიები შეუჩერდა 16 ტურისტულ ბიუროს, რომელთა მეშვეობითაც საუდის არაბეთში იმოგზაურეს მორწმუნეებმა, რომლებსაც არ ჰქონდათ ამის უფლება. საუდის არაბეთს კომენტარი არ გაუკეთებია მაღალი სიკვდილიანობის შესახებ ცნობაზე. სიცხის მსხვერპლთა შორის ასევე არიან ტუნისის, იორდანიის, ირანის, სენეგალის, ინდონეზიისა და სხვა ქვეყნების მოქალაქეები. ჰაჯის მრავალი რიტუალი, როგორებიცაა ქააბის წმინდა ქვისთვის შემოვლა მექაში და სავალდებულო ასვლა არაფატის მთაზე, მუსლიმებისგან მოითხოვს დღის განმავლობაში მცხუნვარე მზეში ყოფნას. წელს 1,8 მილიონზე მეტმა მორწმუნემ შეასრულა ჰაჯი მექაში. შარშან, როდესაც ჰაჯი ასევე ივნისს დაემთხვა, მინიმუმ 240 სიკვდილი აღირიცხა სიცხისა და დეჰიდრაციის გამო. რეგიონში ჩატარებული კვლევები აჩვენებს, რომ ზაფხულის ტემპერატურები, რომლებიც თვით საუდის არაბეთისთვისაც კი ანომალიურია, დაკავშირებულია კლიმატის გლობალურ ცვლილებასთან. ექსპერტების აზრით, მექის რაიონში საშუალო ტემპერატურა ყოველ ათწლეულში სტაბილურად იზრდება 0,4 გრადუსით. ჰაჯი ერთ-ერთია „ისლამის ხუთი სვეტიდან“, ანუ მორწმუნის მოვალეობებიდან. იგი მოიცავს მექაში მომლოცველობას, ალ-ჰარამის მეჩეთის მოხილვას, იქ მდებარე ქააბის წმინდა ქვის გარშემო შემოვლას, არაფატის მთაზე ასვლას, ეშმაკის სიმბოლურ ჩაქოლვას და სხვა რიტუალებს. ითვლება, რომ ყოველი მუსლიმი ვალდებულია ცხოვრებაში ერთხელ მაინც შეასრულოს ჰაჯი, თუ მას აქვს ასეთი შესაძლებლობა. ჰაჯის დრო გამოითვლება მთვარის მუსლიმური კალენდრის მიხედვით. წელს და შარშან ის ივნისზე მოდიოდა. ჰაჯის კვირა ივნისის დასაწყისს დაემთხვევა გაისადაც, 2025 წელს. ...