დააკავეს ბოლივიის არმიის ყოფილი მეთაური, გენერალი ხუან ხოსე სუნიგა. ის ხელმძღვანელობდა შეიარაღებულ დაჯგუფებას, რომელიც ლა-პასში სამთავრობო კომპლექსის დაკავებას ცდილობდა. მას ტერორიზმსა და შეიარაღებულ ამბოხში ადანაშაულებენ. დაკავების შესახებ ინფორმაციას Bolivia TV ავრცელებს. ტელეარხმა ვიდეო გაავრცელა, რომელშიც ჩანს, როგორ გამოჰყავთ გენერალი პოლიციელებს გენშტაბის შენობიდან და სვამენ ავტომობილში. მანამდე სუნიგამ ჟურნალისტებს მოვლენების თავისი ვერსია უამბო. მისი სიტყვებით, 23 ივნისს შეხვდა ბოლივიის პრეზიდენტს, ლუის არსეს, რომელმაც თითქოს სთხოვა პოპულარობის გაზრდაში დახმარება. 26 ივნისს ნიღბიანმა შეიარაღებულმა ჯგუფმა ჯავშანტექნიკის დახმარებით დაიკავა ლა-პასეს ცენტრალური მოედანი, სადაც პრეზიდენტის რეზიდენცია და პარლამენტის შენობა მდებარეობს. ისინი კარის შემტვრევას და შენობაში შეღწევას ცდილობდნენ. სამხედროებს ხელმძღვანელობდა გენერალი სუნიგა, რომელიც ერთი დღით ადრე თანამდებობიდან გაათავისუფლეს ყოფილი პრეზიდენტის, ევო მორალესის მიმართ მუქარის გამო, თუმცა მან გადადგომაზე უარი განაცხადა. გენერალმა თავისი ჯგუფის მოქმედებებს უწოდა ქვეყანაში არსებული ვითარების მიმართ „უკმაყოფილების გამოხატვა“ და თქვა, რომ მიიღებს ზომებს „მთავრობის შესაცვლელად“. სამხედროების მოქმედებები დაგმო ბოლივიის პრეზიდენტმა ლუის არსემ, რომელიც ალყაში მოქცეულ ერთ-ერთ შენობაში იმყოფებოდა. მან სამხედროებს მოუწოდა, „პატივი ეცათ დემოკრატიისთვის“ და მოქალაქეებს კი - შესწინააღმდეგებოდნენ „გადატრიალების მცდელობას“. არსეს მომხრეებმა მურილიოს მოედანზე გასვლა სცადეს, ისინი სამხედროებმა ცრემლსადენი გაზის გამოყენებით დაშალეს. მოგვიანებით პრეზიდენტმა განაცხადა, რომ დანიშნა ახალი სამხედრო ხელმძღვანელობა და ფიცი დაადებინა არმიის მთავარსარდალს, ხოსე უილსონ სანჩესს, რომელმაც სამხედროებს თავიანთ ნაწილებში დაბრუნება უბრძანა. ამის შემდეგ სამხედროებმა მურილიოს მოედნის დატოვება დაიწყეს, წერს სააგენტო EFE. ბოლივიის პროკურატურამ სუნიგას და სხვათა მოქმედებებზე გამოძიება დაიწყო. სამხედროების მოქმედებები დაგმეს ჩილეს, ეკვადორის, პერუს, მექსიკის, კოლუმბიის, ვენესუელისა და ბრაზილიის ლიდერებმა. თეთრ სახლში განაცხადეს, რომ პრეზიდენტი ჯო ბაიდენი ყურადღებით აკვირდება ბოლივიაში მიმდინარე პროცესებს და სიმშვიდისკენ მოუწოდებს. ...