უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა BBC-ისთვის მიცემულ ინტერვიუში ისაუბრა ბრიტანელი მემარჯვენე პოპულისტი პოლიტიკოსის, ნაიჯელ ფარაჟის მიერ ახლახან გამოთქმულ მოსაზრებებზე უკრაინაში მიმდინარე ომის შესახებ. გასული კვირის ბოლოს ფარაჟმა ბრიტანეთის მედიაში განაცხადა, რომ დასავლეთმა, ევროკავშირისა და ნატოს სახით, აღმოსავლეთისკენ გაფართოების გადაწყვეტილებით მოახდინეს პუტინის პროვოცირება, თავს დასხმოდა უკრაინას. მისი აზრით, პუტინს მისცეს საბაბი იმისთვის, რასაც ის ისედაც აპირებდა. გარდა ამისა, მიმდინარე კვირაში ფარაჟმა განაცხადა, რომ უკრაინის პრეზიდენტი ვოლოდიმირ ზელენსკი უნდა დაფიქრდეს, რამდენად რეალისტურია რუსეთის მიერ მიტაცებული ყველა უკრაინული ტერიტორიის დაბრუნება. დიდი ბრიტანეთის ყველა დიდი პოლიტიკური პარტიის ლიდერებმა დაგმეს ფარაჟი ამ გამონათქვამებისთვის. ბევრის აზრით, ფარაჟის მოსაზრებები ემთხვევა რუსულ პროპაგანდას. „ცხადია, ნებისმიერი წინადადება, რომელიც უკრაინას კაპიტულაციის სასურველობაზე მიუთითებს, უკიდურესად ამაზრზენია მორალური თვალსაზრისით და ერთობ ახლომხედველია პოლიტიკური თვალთახედვით. ვინაიდან ეს ხელს შეუწყობს რუსეთის აგრესიული სურვილების ზრდას,“ თქვა პოდოლიაკმა. „ბატონი ფარაჟის წინადადება ასე გამოიყურება: ‘ისინი მოვიდნენ უკრაინის დასანგრევად, ისინი მოვიდნენ უკრაინელების დასახოცად. მაგრამ თქვენ, უკრაინელები, მაინც უნდა დადგეთ მუხლებზე და დაეთანხმოთ ამას. საკუთარი მიწები უნდა დათმოთ. უნდა დათმოთ თქვენი შინაგანი და საგარეო სუვერენიტეტი. უნდა დაივიწყოთ მოტაცებული ბავშვები და სისტემატური წამება ოკუპირებულ ტერიტორიებზე. და რუსეთისგან არაფერი არ უნდა მოითხოვოთ’. ეს მინიმუმ სასაცილო და უსამართლოა“, აღნიშნა უკრაინის პრეზიდენტის ოფისის ხელმძღვანელის თანაშემწემ. ...