კობახიძემ აღნიშნა, რომ ჯილდოს შესახებ ფეხბურთელებს შეხვედრის დროს უთხრეს. მისივე სიტყვებით, ნაკრების წევრებს შეახსენეს, რომ იგივე განმეორდება მომდევნო თამაშის მოგების შემთხვევაშიც. "ეს ჯილდო დამატებით მოტივაციას შექმნის. უკვე გადაეცა ნაკრებს პირველი 30 მილიონი, რომელიც იყო დაწესებული ჯგუფიდან გასვლისთვის და ჩვენ როცა შევხვდით ნაკრების მოთამაშეებს, შევახსენეთ, რომ შემდეგი თამაშიც არის დაკავშირებული ასეთ ჯილდოსთან და ეს კიდევ უფრო მეტად შექმნის მოტივაციას. კიდევ ერთხელ ვიტყვი, დამატებით მოტივაცია ფეხბურთელებს არ სჭირდებათ, ძალიან დიდია მათში ჟინი და მოგების სურვილი შემდეგ თამაშზეც. ეს ყველაფერი არის შესაძლებელი. მიუხედავად იმისა, რომ ესპანეთი არის ჩემპიონატის ერთ-ერთი ფავორიტი, ყველაფერი არის შესაძლებელი", - განაცხადა ირაკლი კობახიძემ. 23 აპრილს ბიძინა ივანიშვილის ფონდმა „ქართუმ“ გაავრცელა განცხადება, რომლითაც ნაკრებს 30 მილიონ ლარს დაჰპირდა ჩემპიონატის ქვეჯგუფიდან გასვლის შემთხვევაში. ასევე ნახეთ „ქართუ“ საფეხბურთო ნაკრებს ქვეჯგუფიდან გასვლის შემთხვევაში 30 მილიონს ჰპირდება 26 ივნისს საქართველოს ფეხბურთის ნაკრებმა პორტუგალია ხვიჩა კვარაცხელიასა და გიორგი მიქაუტაძის გოლებით დაამარცხა და ევროპის ჩემპიონატის მერვედფინალში გავიდა. მერვედფინალში საქართველოს ნაკრები ესპანეთს დაუპირისპირდება. ...