აშშ-ში შედგა პირველი დებატები დემოკრატიული და რესპუბლიკური პარტიების საპრეზიდენტო კანდიდატებს, ჯო ბაიდენსა და დონალდ ტრამპს შორის ტელეკომპანია CNN-ის მიერ ორგანიზებულ დებატებში კანდიდატებს შესთავაზეს, პასუხები გაეცათ ამერიკელებისთვის ყველაზე პრობლემატურ საკითხებზე: მაღალ ინფლაციაზე, აბორტის უფლებაზე, უკანონო მიგრაციაზე, უკრაინისადმი დახმარებაზე, ოჯახისა და ბავშვების მხარდაჭერაზე, აფროამერიკელების პრობლემებზე, კლიმატის ცვლილებებთან ბრძოლაზე, არჩევნების შედეგების პატივისცემასა და სხვა. ორივე კანდიდატმა აარიდა თავი ბევრ კითხვას, საათ-ნახევრიანი დებატების განმავლობაში ისინი წინასწარ მომზადებულ თეზისებს მისდევდნენ. პრეზიდენტი ბაიდენი აცხადებდა, რომ მისი ხელმძღვანელობის პირობებში ქვეყანა წარმატებით გაუმკლავდა რეცესიის შედეგებს, რომლებიც COVID პანდემიით იყო გამოწვეული, რომ მისი ადმინისტრაციის პოლიტიკის დამსახურებით მცირდება ინფლაცია, შემცირდა წამლებზე ფასები ხანდაზმული ამერიკელებისთვის. ბაიდენმა თქვა, რომ გადასახადებს გაუზრდის მაღალშემოსავლიან ამერიკელებს, სოციალური პროგრამების მხარდაჭერის შესანარჩუნებლად. ყოფილი პრეზიდენტის, დონალდ ტრამპის განცხადებით, მიმდინარე ეკონომიკური ზრდა არის მისი პრეზიდენტობის დროს გადასახადების შემცირებისა და ეკონომიკის რეგულირებაში სახელმწიფოს ჩარევის შემცირების პოლიტიკის შედეგი. მან ბაიდენი დაადანაშაულა არალეგალური მიგრაციის წახალისებაში, რაც, მისი თქმით, კიდე უფრო აზიანებს ხელმოკლე ამერიკელების მდგომარეობას. დებატების დაძაბული ნაწილი უკრაინაში რუსეთის შეჭრას უკავშირდებოდა. დონალდ ტრამპმა რამდენჯერმე გაიმეორა თავისი თეზისი, რომ რუსეთი უკრაინაში ვერ შეიჭრებოდა, თვითონ რომ ყოფილიყო ამერიკის პრეზიდენტი. მისი თქმით, ავღანეთიდან ამერიკული არმიის „სამარცხვინო“გასვლამ მისცა პუტინს უკრაინაში ომის დაწყების გამბედაობა. ტრამპის თქმით, ბაიდენის პოლიტიკას ვითარება მესამე მსოფლიო ომამდე მიჰყავს. ბაიდენმა კი განაცხადა, რომ ტრაპის მოქმედებები, ის, რომ არ სურს უკრაინის დახმარება, შესაძლოა პუტინს უბიძგებდეს, თავს დაესხას ნატოს წევრ რომელიმე სახელმწიფოს, რაც მესამე მსოფლიო ომს გამოიწვევს. დებატების წამყვანის შეკითხვის პასუხად ტრამპმა თქვა, რომ არ ეთანხმება პუტინის მიერ შეთავაზებულ მშვიდობიანი დარეგულირების გეგმას და რუსეთის პრეზიდენტს დამნაშავე უწოდა. თუმცა დაამატა, რომ პრეზიდენტად არჩევის შემთხვევაში, შეძლებს უკრაინაში ომის შეწყვეტას მანამდე, სანამ ოფიციალურად შეუდგება საპრეზიდენტო უფლებამოსილების შესრულებას. აშშ-ში საპრეზიდენტო არჩევნები შემოდგომაზე ჩატარდება. ...