სამხრეთ კორეის მრეწველობის სამინისტრომ განაცხადა, რომ კიდევ 243 პროდუქტს დაამატებს იმ საქონლის სიას, რომელთა მიწოდებაც აკრძალულია რუსეთისა და ბელარუსისთვის. როგორც სააგენტო Yonhap-ი იუწყება, აგვისტოს ბოლოსთვის ამ ქვეყნებში იმპორტისთვის აკრძალული სამხრეთკორეული საქონლის სია 1402 პროდუქტამდე გაიზრდება. უწყების ცნობით, ახალი შემაკავებელი ზომები შეეხება ოპტიკური ხელსაწყოებისა და სენსორების ნაწილებს, ასევე ლითონის საჭრელ აღჭურვილობას. რუსეთის წინააღმდეგ საექსპორტო კონტროლის გაფართოების მთავარი მიზეზი იყო რუსეთსა და ჩრდილოეთ კორეას შორის ყოვლისმომცველი სტრატეგიული პარტნიორობის შეთანხმების ხელმოწერა, რომლის ერთ-ერთი პუნქტი უზრუნველყოფს მხარეების მიერ ერთმანეთის სამხედრო დახმარებას მესამე ქვეყნის შეჭრის შემთხვევაში. საპასუხოდ სეულმა განაცხადა, რომ განიხილავს უკრაინისთვის ლეტალური იარაღის მიწოდების საკითხს. ჩრდილოეთ კორეაში ბოლო ვიზიტის დროს რუსეთის პრეზიდენტმა ვლადიმირ პუტინმა ჩრდილოეთ კორეის ლიდერ კიმ ჩენ ინს აჩუქა რუსული ლიმუზინი „აურუსი“, რითაც დაარღვია გაეროს სანქციები, რომლებიც გაერომ დაუწესა ჩრდილოეთ კორეას სამხედრო ბირთვული პროგრამის შემუშავების გამო. როგორც Reuters-მა გაარკვია, ამ მანქანის ბევრი ნაწილი სამხრეთ კორეიდან შეაქვთ რუსეთში. Reuters-ი აღნიშნავს, რომ სამხრეთკორეული კომპანიები „აურუსის“ უმსხვილეს მიმწოდებლებს შორის იყვნენ. უკრაინაში ომის დაწყების შემდეგ, როგორც გამოცემა აღნიშნავს, სამხრეთ კორეიდან მიწოდება არ შეჩერებულა და 2022 წლის თებერვლიდან ექსპორტირებული საქონლის ღირებულებამ მინიმუმ ხუთი მილიონი დოლარი შეადგინა. 2024 წლის თებერვალში შეერთებულმა შტატებმა სანქციები დაუწესა „აურუსის“ ქარხანას, რომელიც თათრეთის ქალაქ ელაბუგაში მდებარეობს. ...