ევროპაში დისლოცირებული რამდენიმე ამერიკული სამხედრო ბაზა გაძლიერებულ მზადყოფნაში მოიყვანეს და მათი დაცვის დონე გაზარდეს. ამის შესახებ ტელეკომპანია CNN-ი იუწყება ორ ამერიკელ ოფიციალურ პირზე დაყრდნობით. წყაროთა ცნობით, მსგავს ზომებს გასულ შაბათ-კვირას მიმართეს, მათ შორის გერმანიის ქალაქ შტუტგარტის გარნიზონში, სადაც განთავსებულია ევროპაში აშშ-ის შეიარაღებული ძალების სარდლობის შტაბ-ბინა. CNN-ის წყაროთა თანახმად, დაცვა გააძლიერეს დონემდე „ჩარლი“, რომელსაც იყენებენ რაიმე ინციდენტის ან შესაძლო ტერაქტსა და თავდასხმასთან დაკავშირებული სადაზვერვო მონაცემების მიღების შემთხვევაში. რესპონდენტმა, რომელიც ევროპაში ერთ-ერთ ამერიკულ ბაზაზე იმყოფება, CNN-ს უთხრა, რომ მსგავსი ზომები სულ მცირე 10 წელია აღარ მიუღიათ. აშშ-ის შეიარაღებული ძალების ევროპული სარდლობის წარმომადგენელმა დენ დეიმ კონკრეტული ზომების კომენტირებაზე უარი თქვა და ტელეკომპანიას ზოგადად მხოლოდ ის განუცხადა, რომ მუდმივად აფასებენ სხვადასხვა ფაქტორს, რომლებიც გავლენას ახდენს საზღვარგარეთ ამერიკელი სამხედროების უსაფრთხოებაზე და ხშირად იღებენ დამატებით ზომებს. როგორც CNN-ი წერს, დაუდგენელია, რა შინაარსის სადაზვერვო მონაცემებმა გამოიწვია ამერიკულ ბაზებზე უსაფრთხოების ზომების გაძლიერება. ევროპაში პოტენციურ ტერორისტულ საფრთხეებს განსაკუთრებით უკავშირებენ გერმანიაში მიმდინარე ევროპის საფეხბურთო ჩემპიონატს და ზაფხულის ოლიმპიადას, რომელსაც ივლისში უმასპინძლებს საფრანგეთის დედაქალაქი პარიზი. გერმანიის და საფრანგეთის მთავრობებმა უსაფრთხოების დამატებით ზომებს მიმართეს. ...