„ბიძინა ივანიშვილს ჰყავს გაგზავნილი საქართველოს მთავრობის წარმომადგენელი თავის პერსონალურ შიკრიკად. ჯობდა, რომ არ გაეგზავნა... ჰგონიათ, რომ პოლიტიკიდან გაწეული ე.წ. საპატიო თავმჯდომარე ქვეყნის ერთ-ერთ მთავარ ძალოვან ფიგურას რომ აგზავნის შიკრიკად, თავის „ფოსტალიონად“ უცხო ქვეყანაში, ეს ჰგონია სწორად ან უძლეველობის წარმომსახველად...“ - თქვა გიორგი გახარიამ. რადიო თავისუფლებამ გაარკვია, რომ ბოლო პერიოდში ძალოვანი უწყებებიდან აშშ-ში იმყოფებოდა სახელმწიფო უსაფრთხოების სამსახურის უფროსი გრიგოლ ლილუაშვილი. უწყებაში ამბობენ, რომ პარლამენტში ყოველწლიური მოხსენებით გამოსვლის შემდეგ, რომელიც 12 ივნისს იყო, ლილუაშვილი აშშ-ში გაემგზავრა, სადაც შეხვედრებს მართავს ყოველწლიურად. „ჩვეულებრივი სამუშაო ვიზიტი იყო უსაფრთხოების მიმართულებით“, - აცხადებენ პრესსამსახურში. მოგვიანებით კი უწყებაში დააზუსტეს, რომ ყოველწლიური შეხვედრა მაისის შუა რიცხვებში იყო დაგეგმილი და ივნისის ბოლოსთვის გადაიწია. სახელმწიფო უსაფრთხოების სამსახურში არ უთქვამთ, ვისთან ერთად იყო ლილუაშვილი აშშ-ში. პარტია „ქართული ოცნების“ წევრი და პარლამენტის ვიცე-სპიკერი, გია ვოლსკი ამბობს, რომ საქართველოს და აშშ-ს საერთო ინტერესები აქვთ ტერორიზმთან და სხვა საფრთხეების დაძლევასთან დაკავშირებით. „არ მეგონა, გიორგი გახარია თუ ასე დაბლა დაეცემოდა და ნულს ქვემოთ, იატაკს ქვემოთ ჩავარდებოდა - რა სისულელეებს ლაპარაკობს! რა შიკრიკი?! ბატონი გახარია ზრდილობასთან ერთად, ლოგიკასაც მოისაკლისებს!“ - უთხრა ჟურნალისტებს გია ვოლსკიმ. ხელისუფლების წარმომადგენლების აშშ-ში მოგზაურობის საკითხით მედია მას შემდეგ ინტერესდება, რაც ცნობილი გახდა, რომ „აგენტების კანონის“ მიღების გამო სანქცია დაუწესდა მათ, ვინც პასუხისმგებელია საქართველოში დემოკრატიის ძირის გამოთხრაზე. ასევე ნახეთ აშშ ინდივიდუალურ სანქციებს, სავიზო აკრძალვებს უწესებს “ქართული ოცნების” წევრებსა და დეპუტატებს ...