უეფა აცხადებს, რომ საქართველოსა და თურქეთის ფეხბურთის ფედერაციები ქომაგებს შორის დაპირისპირების გამო დააჯარიმა. ევროპის ჩემპიონატზე საქართველომ პირველი მატჩი 18 ივნისს გერმანიის ქალაქ დორტმუნდში, „სიგნალ იდუნა პარკზე“, თურქეთის წინააღმდეგ გამართა. ჯგუფური ეტაპის მატჩის დაწყებამდე, ორივე ქვეყნის გულშემატკივრები ერთმანეთს ფიზიკურად დაუპირისპირდნენ. უეფას გადაწყვეტილებით, ​საქართველოს ფეხბურთის ფედერაციას 30 000 ევროს გადახდა დაეკისრა, თურქეთისას - 25 000 ევროს. გარდა ამისა, ამ თამაშზე გულშემატკივრის მიერ სტადიონზე პიროტექნიკის ანთების გამო, საქართველოს ფეხბურთის ფედერაცია 6 250 ევროთი, ხოლო, თურქეთის - 9 750 ევროთი დაჯარიმდა. 26 ივნისს, გელზენკირხენში, საქართველო-პორტუგალიის შეხვედრაზე მოედანზე გულშემატკივრის შეჭრის გამო, საქართველოს ფეხბურთის ფედერაცია კიდევ 8000 ევროთი დააჯარიმეს. ამავე მატჩზე ფანების მიერ სტადიონზე ანთებული პიროტექნიკის გამო, მას დაეკისრა ჯარიმა, 1 750 ევრო. პორტუგალია კი 3 750 ევროთი დაჯარიმდა, ქომაგების მიერ საგნების სროლის გამო. უეფას მონაცემებით, ჯამში საქართველოს ფეხბურთის ფედერაცია 46 000 ევროთი დაჯარიმდა, რაც ამჟამინდელი კურსით, დაახლოებით, 138 000 ლარია. ამ დროისთვის ევრო 2024-ის ყველაზე სანახაობრივ მატჩად შეფასებულ შეხვედრაში, საქართველო თურქეთთან 1-3 დამარცხდა, თუმცა „ჯვაროსნებმა“ ჩეხეთთან ფრისა (1-1) და პორტუგალიის (2-0) დამარცხების შემდეგ, პლეი-ოფში გასვლა შეძლეს. მერვედფინალში საქართველო ჩემპიონატის ერთ-ერთ მთავარ ფავორიტთან, ესპანეთთან დამარცხდა (4-1) და ევროპის ჩემპიონატს გამოეთიშა. „საქართველო ევრო 2024-ს ზღაპრული დღეების შემდეგ ტოვებს. სანიოლის ნაკრებმა მოლოდინს მნიშვნელოვნად გადააჭარბა“, - ასე შეაფასეს BBC-ზე „ჯვაროსნების“ პირველი გამოსვლა დიდ სანაკრებო ტურნირზე. ასევე ნახეთ ეროვნული ნაკრების ფეხბურთელები საქართველოში დაბრუნდნენ საქართველოს ნაკრები თბილისში 2 ივლისს დაბრუნდა. ფეხბურთელებს აეროპორტში გულშემატკივრები დახვდნენ. ასევე ნახეთ საქართველოს ეროვნული ნაკრები უეფასგან 12.25 მილიონ ევროს მიიღებს ...