თავდაცვის ძალების წარმომადგენლებმა ის სახლში სამხედრო პატივით დაასვენეს. საკაცეს საქართველოს ეროვნული დროშა ჰქონდა გადაფარებული. დედამ შვილის დაღუპვის შესახებ ჯერ არ იცის, რადგან ავადმყოფობის გამო გორის სამხედრო ჰოსპიტალში გადაიყვანეს. კახა ზურაბაშვილმა გორის მე-4 სკოლა დაასრულა, რის შემდეგაც სამხედრო სამსახურში წავიდა, უკრაინაში კი ავიაციის უმაღლესი სასწავლებელი დაამთავრა. ამის შემდეგ ის საქართველოს თავდაცვის ძალების ავიაციის პილოტი გახდა. ზურაბაშვილი 2008 წლის აგვისტოს ვეტერანი იყო. три ოჯახის ახლობლები ვერ იჯერებენ, რომ 20 წელზე მეტი ხნის გამოცდილების მფრინავი შეცდომას დაუშვებდა. კახა ზურაბაშვილი გამოცდილი მფრინავი იყო და ხელმძღვანელობდა ახალგაზრდა პილოტების გადამზადებას სუ-25 ტიპის მოიერიშე თვითმფრინავებზე. "2000 წლიდან სამხედრო პირი იყო. ავიაციის უმაღლესი სასწავლებელი უკრაინაში დაამთავრა. შაბათ-კვირას ყოველთვის აქ იყო. დედა ჰყავს ჩავარდნილი ავადმყოფი და თვითონ უვლიდა. ძმაც დაღუპული ჰყავს, მამაც და ჩამოდიოდა ხოლმე შაბათ-კვირას, დედას უვლიდა. მარნეულში ცხოვრობდა, იქ მუშაობდა", - ამბობს ტრაგიკულად დაღუპული პილოტის ოჯახის ახლობელი ბაბულია ჩიხლაძე. 3 ივლისს ბოლნისის მუნიციპალიტეტში სამხედრო თვითმფრინავის, სუ 25-ის ჩამოვარდნის შესახებ განცხადება გაავრცელა საქართველოს თავდაცვის სამინისტრომ. როგორც ის აღნიშნავს, წინასწარი მოკვლევით, საფრენი აპარატი გაფრენამდე სრულად იყო შემოწმებული ტექნიკური დოკუმენტაციის მოთხოვნათა შესაბამისად. ასევე ჩატარებული იყო წინასაფრენოსნო მომზადება და დაცული იყო რეგლამენტით გათვალისწინებული ყველა პროცედურა. თავდაცვის სამინისტროს განცხადებაში წერია, რომ გამოძიება დაიწყო სისხლის სამართლის კოდექსის 401-ე მუხლით, „სამხედრო-საჰაერო ხომალდის ფრენისას უსაფრთხოების წესების დარღვევის ფაქტზე“ [მუხლი 401. საფრენი აპარატის მართვის ან ექსპლუატაციის წესის დარღვევა - სამხედრო საფრენი აპარატის მართვის ან ფრენისათვის მზადების წესის ანდა მისი ექსპლუატაციის წესის დარღვევა, რამაც გამოიწვია ადამიანის სიცოცხლის მოსპობა ან სხვა მძიმე შედეგი, – ისჯება თავისუფლების აღკვეთით ვადით ხუთიდან ათ წლამდე]. სამინისტროს ცნობით, გენერალური პროკურატურის საპროცესო ზედამხედველობით, გამოძიებას აწარმოებს სამხედრო პოლიცია. „თავდაცვის ძალების კუთვნილი სუ-25 ტიპის საფრენი აპარატის კატასტროფის ადგილზე, შესაბამისი სამსახურების მიერ საგამოძიებო მოქმედებები რამდენიმე ჰექტარ ფართობზე მთელი ღამის განმავლობაში მიმდინარეობდა. შემთხვევის ადგილზე იმყოფებოდნენ საქართველოს თავდაცვის მინისტრი ირაკლი ჩიქოვანი და თავდაცვის ძალების მეთაური, გენერალ-მაიორი გიორგი მათიაშვილი. "ტრაგიკული ინციდენტის სრულყოფილი შესწავლის მიზნით, შესაბამისი სამსახურების მიერ ყველა საჭირო პროცედურ...