ამ საქმეზე გამოძიება სისხლის სამართლის კოდექსის 154-1 და 333-3-ბ მუხლებით მიმდინარეობს. პოლიციამ გელა მთივლიშვილი 23 იანვარს თბილისში, კეკელიძის ქუჩაზე, საცხოვრებელი ბინიდან ოჯახის გამოსახლების დროს მიმდინარე აქციაზე დააკავა. მთივლიშვილის თქმით, იგი ადგილზე პროფესიული მოვალეობის შესასრულებლად მივიდა, პოლიციამ კი მოგვიანებით დაუმორჩილებლობის მიზეზით დააკავა. როგორც ის ჰყვება, დაკავების შემდეგ პოლიციელებმა მასზე ფიზიკურად იძალადეს. "ზუსტად 2-3 წუთის მისული ვიყავი, აქციასთან არანაირი საერთო არ მქონია, არც შიგნით ვყოფილვარ, არც არავისთვის ხელი შემიშლია. ერთ-ერთი ახალგაზრდის დაკავების პროცესს მივყევი ბოლომდე, ვიდრე მას მანქანაში შეტენიდნენ. ვხედავდი, რომ ის ახალგაზრდა წინააღმდეგობას არ უწევდა, მაგრამ მაინც ძალადობდნენ. დამინახეს, რომ ვიღებდი ამ ყველაფერს. ერთ-ერთმა პოლიციელმა მკრა ხელი და მიმახეთქა ხეს. ვუთხარი, რას აკეთებ, ჟურნალისტი ვარ, რატომ ირტყმევინები-მეთქი. ამის შემდეგ გამწარდნენ, შემაგდეს მანქანაში, რამდენიმე პოლიციელი დამეხვია. იმ ძალით შემაგდეს, რომ მანქანის იატაკზე დავვარდი. ადგომას რომ ვცდილობდი, ეგონათ წინააღმდეგობას ვუწევდი და ყვიროდნენ, წინააღმდეგობას გვიწევო. მე ვეუბნებოდი, რომ დავემორჩილებოდი... სულ ხუთი პოლიციელი იყო: ერთი საჭესთან, ოთხი კრიმინალური პოლიციის ფორმაში. მათგან სამი განსაკუთრებით აგრესიული იყო, ერთი უკნიდან ჩამწვდა თავში და კისერში, მეორე - წინიდან. ველურებივით იქცეოდნენ, მეგონა მახრჩობდნენ. პირველად აღმოვჩნდი ასეთ სიტუაციაში ამ ხელისუფლების პირობებში, მაგრამ ასეთი დაკავება არ მახსოვს, მით უფრო ჟურნალისტის მიმართ. რაღაც მომენტში გავიაზრე, რომ რაიმე არ ჩაერტყათ, არაადეკვატურები იყვნენ", - თქვა გელა მთივლიშვილმა 23 იანვარს, წინასწარი დაკავების იზოლატორის დატოვების შემდეგ. მისივე სიტყვებით, დაკავების შემდეგ შეუძლოდ გახდა, თუმცა ვერც ადგილზე და ვერც წინასწარი დაკავების იზოლატორში გადაყვანის შემდეგ სამედიცინო დახმარება ვერ მიიღო. ასევე ნახეთ "მეგონა, მახრჩობდნენ" - ჟურნალისტი გელა მთივლიშვილი დაკავების პროცესს იხსენებს ...