ვაშინგტონის ომის შემსწავლელი ინსტიტუტი (ISW) ყოველდღიურ ანგარიშში წერს, რომ უკრაინა თანდათანობით წყვეტს პირადი შემადგენლობის უკმარისობის პრობლემას, რომელიც მწვავედ შეინიშნებოდა მიმდინარე წლის დასაწყისში, მაგრამ ქვედანაყოფების ფორმირებისთვის საკმარისი არ არის შეიარაღება, რომელსაც კიევი დასავლეთიდან იღებს. ამერიკელი ანალიტიკოსების დასკვნა, რომ პირადი შემადგენლობის უკმარისობა აღარ არის მწვავე, ეყრდნობა უკრაინის პრეზიდენტ ვოლოდიმირ ზელენსკის განცხადებას სააგენტო Bloomberg-ისთვის მიცემულ ინტერვიუში, ასევე ჩასოვ-იარის რაიონში მოქმედი ბრიგადის მეთაურის ნათქვამს, რომ ამჟამად საბრძოლო მასალის დეფიციტი უფრო დიდია, ვიდრე ადამიანებისა. „დასავლეთის მხრიდან უსაფრთხოების სფეროში დროული და სათანადო დახმარება უმნიშვნელოვანეს ფაქტორად რჩება იმისთვის, თუ როდის და რა მასშტაბით შეძლებენ უკრაინის ძალები ბრძოლის ველზე ინიციატივისთვის ბრძოლის დაწყებას და მომავალში ოპერატიულად მნიშვნელოვანი კონტრიერიშის ოპერაციების გატარებას“, - აღნიშნავს ISW. ამერიკელ ანალიტიკოსთა თანახმად, ოპერატიულად მნიშვნელოვანი კონტრიერიშების ოპერაციების ისეთ დროს ჩატარება, რომელსაც ის თავად შეარჩევს, უკრაინისთვის აუცილებელია იმისთვის, რომ თავიდან იქნეს აცილებული ომის გაჭიანურება. „რუსეთის პრეზიდენტ ვლადიმირ პუტინის გამარჯვების თეორია, რომელიც იმაში მდგომარეობს, რომ რუსეთი განუსაზღვრელად დიდი ხნით შეძლებს უკრაინაში მცოცავ გადაადგილებას, როგორც ჩანს, პუტინს ომის გაჭიანურების სტიმულს აძლევს […] და ნაკლებ სავარაუდოა, რომ პუტინის გეგმები შეიცვლება, თუკი უკრაინა რუსეთის ჯარებს შემდგომ მნიშვნელოვან მარცხს არ აწვნევს“, - წერენ ანგარიშის ავტორები. მათი თქმით, რაც უფრო დიდხანს უნდა ელოდოს უკრაინა ახალი ბრიგადების აღჭურვასა და განლაგებას, მით უფრო მეტად ექნებათ რუსეთის ჯარებს იმის საშუალება, რომ ჩაშალონ უკრაინის ძალისხმევა, მომავალი კონტრიერიშებისთვის აამოქმედოს ახალი ძალები. ...