შაბათს, 5 ივლისს საფრანგეთის დაძაბულ საარჩევნო კამპანიაში პაუზა დადგა საბოლოო კენჭისყრის წინ - იმ ფონზე, როცა საზოგადოებრივ დისკუსიებში ჭარბობს შეშფოთება ბუნდოვანი პოლიტიკური მომავლის შესახებ სახელმწიფოში, რომელიც ერთ-ერთი წამყვანი მოთამაშეა როგორც ევროკავშირში, ისე უფრო ფართოდ, გლობალურ სივრცეში. პარასკევს გამოქვეყნებული, საბოლოო გამოკითხვების თანახმად, ულტრამემარჯვენე "ეროვნული გაერთიანება" და მისი ლიდერი, მარინ ლე პენი ვერ შეძლებენ სრული უმრავლესობის მოპოვებას პარლამენტში. თუმცა საფრანგეთის პრეზიდენტის, ემანუელ მაკრონის მხრიდან გადადგმულმა სარისკო ნაბიჯმა - ვადამდელი არჩევნების დანიშვნამ საიმისოდ, რომ არჩევანი გაკეთებულიყო მისეულ, ცენტრისტულ გზასა და მემარჯვენე და მემარცხენე რადიკალურ კურსებს შორის - მისთვის სასურველი შედეგი არ მოიტანა. მაკრონს ახლა ელის პრეზიდენტობის უკანასკნელი სამი წელიწადი მკაფიო მმართველი უმრავლესობის გარეშე. სოციოლოგიური გამოკითხვების ორგანიზაციების, Ipsos-ისა და Ifop-ის თანახმად, იმიგრაციის მოწინააღმდეგე, ევროსკეპტიკური "ეროვნული გაერთიანება", სავარაუდოდ, 170-დან 210-მდე მანდატს მოიპოვებს პარლამენტში, რაც ნაკლებია აბსოლუტური უმრავლესობისთვის აუცილებელ, 289 მანდატზე. ამავე გამოკითხვების თანახმად, ულტრამემარჯვენე "ეროვნული გაერთიანების" შემდეგ მოდის მემარცხენე ალიანსი, "ახალი სახალხო ფრონტი", რომელსაც 145-დან 175 მანდატამდე ერგება. როგორც ულტრამემარჯვენე, ისე მემარცხენე ჯგუფები მნიშვნელოვნად უსწრებენ მაკრონის ცენტრისტ მოკავშირეებს, რომლებსაც ამჟამინდელ პარლამენტში 250 მანდატი ჰქონდათ. შესაბამისად, საფრანგეთის მოქალაქეებს შესაძლოა კვირას ღამით არ ჰქონდეთ ინფორმაცია იმის შესახებ, თუ ვინ შეძლებს მთავრობის ფორმირებას და გაძღოლას. ლე პენი აცხადებს, რომ იმარჯვებს და აბსოლუტურ უმრავლესობას მოიპოვებს - რამაც მაკრონი შესაძლოა იძულებული გახადოს, პრემიერ-მინისტრად დანიშნოს ლე პენის 28 წლის პროტეჟე, ჟორდან ბარდელა. პრემიერ-მინისტრი გაბრიელ ატალი, თავის მხრივ, აცხადებს, რომ დროებითი მთავრობის ლიდერის როლში დარჩება "რამდენი ხანიც საჭირო იქნება". მაკრონი ოფისში დარჩება 2027 წლის აპრილში დანიშნულ საპრეზიდენტო და საკანონმდებლო არჩევნებამდე, თუმცა მას ახლა მოუწევს ძალაუფლების პოლიტიკურ მეტოქეებთან გაყოფა. პერსპექტივა, რომ მეორე მსოფლიო ომის შემდეგ საფრანგეთში პირველად შეიქმნება ულტრამემარჯვენე მთავრობა, შეშფოთებას იწვევს ქვეყნის ევროპელ მოკავშირეებში - რომლებიც დააბნია მაკრონის რისკმა და ვადამდელი არჩევნების დანიშვნამ. 30 ივნისს გამართული პირველი ტურის შემდეგ, საფრანგეთის ცენტრისტულმა და მემარცხენე პარტიებმა მეორე ტურისთვის შეთანხმებები გააფორმეს, საიმისოდ, რომ არ დაუშვან ულტრამემარჯვენე ძალების აღზ...