წლევანდელი ივნისი სარეკორდოდ ცხელი იყო დაკვირვების მთელი ისტორიის განმავლობაში, იტყობინება Reuters-ი კლიმატის ცვლილების ევროპულ სამსახურ Copernicus-ზე დაყრდნობით. 2023 წლის ივნისიდან მოყოლებული ყოველი თვე ყველაზე ცხელ თვედ ითვლება წინა წლების შესაბამის თვესთან შედარებით. ზოგიერთი მეცნიერის აზრით, წლევანდელმა წელმა შესაძლოა მოხსნას კლიმატის სფეროში გასული წლის რეკორდები. 2023 წელი ყველაზე ცხელ წლად იქნა აღიარებული დაკვირვების მთელი ისტორიის განმავლობაში. 2023 წელს გაეროს მეტეოროლოგებმა გლობალური დათბობა დაუკავშირეს ადამიანის მიერ გამოწვეულ კლიმატის ცვლილებას და „ელ-ნინიოს“ - წყნარი ოკეანის ეკვატორული წყლების ტემპერატურის ზრდის - დაწყებას. მსოფლიო მეტეოროლოგიურმა ორგანიზაციამ ადრე განაცხადა, რომ „დიდი ალბათობაა“ იმისა, რომ 2024 წელს სიცხის ახალი რეკორდები დამყარდებოდა, რადგან ელ-ნინიოს მომდევნო წელი, როგორც წესი, უფრო თბილია ხოლმე. როგორც Reuters-ი აღნიშნავს, წელს კლიმატის ცვლილებამ უკვე გამოიწვია კატასტროფული შედეგები მთელს მსოფლიოში. ივნისში, საუდის არაბეთში, ჰაჯის - მექაში მომლოცველობის - დროს განსაკუთრებული სიცხის შედეგად ათასზე მეტი ადამიანი დაიღუპა. სიცხისგან სიკვდილი დაფიქსირდა ინდოეთის დედაქალაქ დელიშიც. ივლისის დასაწყისში რუსეთის ევროპული ნაწილი არანორმალურმა სიცხემ მოიცვა. 3 ივლისს ამინდის ცენტრ „ფობოსის“ წამყვანმა სპეციალისტმა ევგენი ტიშკოვეცმა განაცხადა, რომ ერთ დღეში 40 სიცხის რეკორდი დაფიქსირდა, აქედან ცხრა - რეგიონულ ცენტრებში. ...