ინდოეთის პრემიერ-მინისტრი, ნარენდრა მოდი 8 ივლისს მოსკოვში შეხვდება რუსეთის პრეზიდენტს, ვლადიმირ პუტინს. ეს არის მოდის პირველი ვიზიტი რუსეთში მას მერე, რაც პუტინმა ორ წელზე მეტი დროის წინ უკრაინაში სრულმასშტაბიანი შეჭრის ბრძანება გასცა. გავრცელებული ცნობებით, მოდის ტურნე ასევე მოიცავს ვიზიტს ავსტრიაში. "ეს ვიზიტები იქნება შესანიშნავი შესაძლებლობა კავშირების გასაღრმავებლად ქვეყნებთან, რომლებთანაც ინდოეთს ხანგრძლივი მეგობრობა აკავშირებს" - წერს მოდი სოციალურ ქსელში და დასძენს, რომ ორივე ქვეყანაში გამართავს შეხვედრებს ინდოელ თემებთან. კრემლის განცხადებით, მოლაპარაკებების თემა იქნება "რუსეთ-ინდოეთის ტრადიციულად მეგობრული კავშირების კიდევ უფრო განვითარება, ისევე, როგორც ამჟამად არსებული საერთაშორისო და რეგიონული საკითხები". ინდოეთი მზარდი მნიშვნელობის სავაჭრო პარტნიორია რუსეთისთვის, მას მერე, რაც მოსკოვს უკრაინაში შეჭრისთვის საერთაშორისო სანქციები დაუწესდა. ჩინეთთან ერთად, ინდოეთი რუსეთის ნავთობის ერთ-ერთი მთავარი მყიდველია. დასავლელი პარტნიორებისგან განსხვავებით, მოდი თავს არიდებს რუსეთის მკაფიოდ დადანაშაულებას უკრაინაში შეჭრისთვის, ან მოსკოვის ნაბიჯების დაგმობას და გამოდის კონფლიქტის მშვიდობიანი გადაწყვეტის სურვილით. კრემლის პრესმდივნის, დმიტრი პესკოვის თქმით, პუტინი და მოდი ერთმანეთს შეხვდებიან "თავისუფალი გეგმით, პირისპირ". ასევე ნახეთ კრემლი: 8-9 ივლისს რუსეთს ეწვევა ინდოეთის პრემიერ-მინისტრი ნარენდრა მოდი ...