ისრაელის უდიდესი ოპოზიციური პარტიის ხელმძღვანელმა 8 ივლისს თქვა, რომ პრემიერ-მინისტრ ბენიამინ ნეთანიაჰუს პარლამენტში მხარდაჭერას გამოუცხადებს, პოსტზე მისი დატოვების მიზნით - თუკი მმართველი კოალიციის წევრები ცეცხლის შეწყვეტის შეთანხმების გამო გაერთიანებას დატოვებენ. ნეთანიაჰუმ თავის წარმომადგენლებს ნებართვა მისცა განაახლონ მოლაპარაკება შესაძლო შეთანხმებაზე ჰამასთან - რომელსაც აშშ და ევროკავშირი ტერორისტულ ჯგუფად მიიჩნევენ - ღაზაში ომის დასრულების და 7 ოქტომბერს მძევლად აყვანილი ისრაელელების გათავისუფლების მიზნით. ნეთანიაჰუს კოალიციაში ულტრამემარჯვენე პარტნიორების ნაწილი აცხადებს, რომ გაერთიანებას დატოვებს თუ ომი დასრულდება ისრაელის მხრიდან ჰამასის სრულ განადგურებამდე და ყველა მძევლის გათავისუფლებამდე. კოალიციის დაშლა ნეთანიაჰუს ხელისუფლების კოლაფსს მოიტანს. პარტია "ეშ-ატიდის" ლიდერმა, იაირ ლაპიდმა თავისი საპარლამენტო ფრაქციის სხდომაზე თქვა - "მძევალთა შესახებ შეთანხმება მაგიდაზეა. არ არის მართალი, რომ ნეთანიაჰუს მოუწევს აირჩიოს მძევალთა საკითხსა და პრემიერ-მინისტრის პოსტზე დარჩენას შორის". ასევე ნახეთ ისრაელის ტანკებმა იერიში მიიტანეს ქალაქ ღაზაზე ...