ფსბ-მ ოთხშაბათს გამოაცხადა, რომ დაკავებულია რუსი სამხედრო, რომელიც ბრალდებულია თავდაცვის სამინისტროს სამი მაღალჩინოსნის მკვლელობის მცდელობის ორგანიზებაში. გავრცელებული ინფორმაციით, ის უკრაინის დაზვერვის დაკვეთით მოქმედებდა. კიდევ ერთი აფეთქება, სავარაუდოდ, სხვა სამხედრო პირს უნდა განეხორციელებინა ავიამზიდ კრეისერ „ადმირალ კუზნეცოვზე“, რუსეთის სამხედრო-საზღვაო ფლოტის ფლაგმანზე, რომელიც რემონტს გადის. რუსეთის სპეცსამსახურში აცხადებენ, რომ ეს სამხედრო სასწრაფოდ დაუკავშირდა სარდლობას მისი გადაბირების მცდელობისთანავე. ინფორმაციის დასადასტურებლად ფსბ-მ გამოაქვეყნა ვიდეო ერთ-ერთი სამხედროს სავარაუდო დაკავებით და მეორის ჩვენებებით, რომელშიც ისინი უკნიდან არიან გადაღებული. კრეისერის შემთხვევაში, აფეთქების ორგანიზებას ცდილობდა უკრაინის სამხედრო დაზვერვა, ნათქვამია რუსეთის კონტრდაზვერვის პრესრელიზში. კიევში ამ ცნობებზე კომენტარი არ გაუკეთებიათ. არ მოიპოვება მთელი ამ ინფორმაციის დადასტურება. სხვა მნიშვნელოვან დეტალებს არ ახსენებენ. „ადმირალი კუზნეცოვი“ ერთადერთი ავიამზიდია რუსეთის ფლოტში. გემი რემონტს გადის 2018 წლიდან, მას შემდეგ, რაც მურმანსკის მახლობლად მცურავ დოკზე მას ამწე დაეცა. 2019 წელს გემზე ხანძარი გაჩნდა. რუსეთის თავდაცვის სამინისტროსთან დაახლოებული არაერთი წყარო იტყობინება, რომ გემი შესაძლოა ჩამოწერონ, თუმცა ეს ოფიციალურად არ დადასტურებულა. ...