8 ივლისს რუსეთის მიერ კიევის დაბომბვის შემდეგ დაღუპულთა რიცხვი 34-მდე გაიზარდა. „ოხმატდეტის“ ბავშვთა საავადმყოფოზე თავდასხმის შედეგად დაჭრილი ბიჭი საავადმყოფოში გარდაიცვალა, განაცხადა უკრაინის ჯანდაცვის მინისტრმა ვიქტორ ლიაშკომ. ამრიგად, საავადმყოფოზე დარტყმის შედეგად დაღუპულთა რიცხვი სამამდე გაიზარდა. ლიაშკოს თქმით, დარტყმის დროს ბავშვი ინტენსიური თერაპიის განყოფილებაში იმყოფებოდა და იძულებული გახდნენ, ის კიევის სხვა საავადმყოფოში გადაეყვანათ. დაბომბვის შემდეგ „ოხმატდეტის“ პაციენტების უმეტესობა გაწერეს ან სხვა საავადმყოფოებში გადაიყვანეს. ასევე ნახეთ რა არის ცნობილი კიევის ბავშვთა საავადმყოფოზე განხორციელებულ სარაკეტო იერიშზე? უკრაინის ხელისუფლება რუსეთს ბავშვთა საავადმყოფოზე მიზანმიმართულ თავდასხმაში ადანაშაულებს. რუსეთი ამას უარყოფს. კრემლის სპიკერმა დმიტრი პესკოვმა განაცხადა, რომ საავადმყოფოს მოხვდა „ანტირაკეტა“, ანუ უკრაინული საჰაერო თავდაცვის რაკეტა. რუსეთის თავდაცვის სამინისტრომ გუშინ იგივე განაცხადა მტკიცებულებების დასახელების გარეშე. უკრაინის უსაფრთხოების სამსახურის თანახმად, მას მოეპოვება მტკიცებულება, რომ ეს იყო რუსული ფრთოსანი რაკეტა. კერძოდ, დაზვერვის სამსახურმა გამოაქვეყნა საავადმყოფოზე თავდასხმის ადგილზე აღმოჩენილი რაკეტა X-101-ის ფრაგმენტების ფოტო. კიევში გაეროს სადამკვირვებლო მისიამ სამშაბათს განაცხადა, რომ ბავშვთა საავადმყოფოს განადგურება „დიდი ალბათობით“ გამოწვეული იყო რუსული რაკეტის პირდაპირი დარტყმით. საერთაშორისო ჰუმანიტარული კანონით აკრძალულია სამოქალაქო პირებზე და სამოქალაქო ობიექტებზე თავდასხმა. რუსეთი კატეგორიულად უარყოფს უკრაინაში სამოქალაქო ობიექტებზე თავდასხმებს. ...