ნატო ვაშინგტონში გამართული სამიტის დეკლარაციაში აცხადებს, რომ უკრაინა ალიანსის წევრობის შეუქცევად გზაზე დგას. „სრულად ვუჭერთ მხარს უკრაინის უფლებას, თავად აირჩიოს საკუთარი უსაფრთხოების მექანიზმები და გადაწყვიტოს საკუთარი მომავალი გარეშე ჩარევის გარეშე. უკრაინის მომავალი ნატოშია“, - წერია დეკლარაციაში, რომელიც ოთხშაბათს საღამოს გამოქვეყნდა. „ვინაიდან უკრაინა აგრძელებს ამ სასიცოცხლოდ მნიშვნელოვან საქმეს, ჩვენ გავაგრძელებთ მის მხარდაჭერას მის შეუქცევად გზაზე სრული ევროატლანტიკური ინტეგრაციისკენ, მათ შორის ნატოს წევრობისკენ“, - ნათქვამია ნატოს ვაშინგტონის სამიტის დეკლარაციაში. ამავე დროს ალიანსის წევრები აღნიშნავენ, რომ უკრაინამ განვლილი წლის განმავლობაში პროგრესს მიაღწია რეფორმების გატარების გზაზე. „ვადასტურებთ, რომ ნატოში წევრობის მიწვევას უკრაინა მიიღებს მას შემდეგ, რაც ალიანსის წევრები ამ საკითხზე შეთანხმდებიან და შესრულებულ იქნება საამისო პირობები“, - ნათქვამია დეკლარაციაში. როგორც ნატოს გენერალურმა მდივანმა იენს სტოლტენბერგმა განაცხადა სამიტზე, დეკლარაცია აჩვენებს, რომ „ჩვენ ნამდვილად გვინდა, რომ უკრაინა ნატოს წევრი გახდეს“. ასევე ნახეთ ბლინკენი: F-16-ები უკვე მიემართებიან უკრაინაში დანიიდან და ნიდერლანდიდან დეკლარაციის თანახმად, ნატოს წევრ ქვეყნებს გადაწყვეტილი აქვთ, უკრაინას მომავალ წელს მინიმუმ 40 მილიარდი ევრო გამოუყონ. ალიანსი ასევე შექმნის მექანიზმს, რომლის მიზანია უკრაინისთვის განკუთვნილი შეიარაღებისა და წვრთნის კოორდინაცია. დეკლარაციაში ნატო უკრაინაში ომისთვის სრულ პასუხისმგებლობას ანიჭებს რუსეთს და მოუწოდებს მას, დაუყოვნებლივ შეწყვიტოს საბრძოლო მოქმედებები და უპირობოდ გაიყვანოს მთელი თავისი ჯარები უკრაინის ტერიტორიიდან. ამავე დროს, დეკლარაციის თანახმად, ნატო მზადაა, მოსკოვთან კავშირების არხები შეინარჩუნოს უკრაინაში ომის ესკალაციის თავიდან ასაცილებლად. დეკლარაციაში საუბარია ასევე ნატოსთვის ინდოეთ-წყნარი ოკეანის რეგიონის მნიშვნელობაზე, ვინაიდან, დოკუმენტის თანახმად, იქ მიმდინარე პროცესები პირდაპირ გავლენას ახდენს ევროატლანტიკურ უსაფრთხოებაზე. ალიანსი მიესალმება აზია-წყნარი ოკეანის რეგიონის პარტნიორებთან თანამშრომლობას უკრაინის მხარდაჭერის საქმეში. ნატოს დეკლარაციაში ნათქვამია, რომ ჩინეთი უკრაინაში რუსეთის სამხედრო ძალისხმევის გადამწყვეტი მნიშვნელობის ხელშემწყობი ხდება, ასევე ის კვლავაც სისტემურ გამოწვევებს უქმნის ევროპის უსაფრთხოებას. დეკლარაციაში ალიანსი შეშფოთებას გამოთქვამს ჩინეთის საქმიანობის გამო კოსმოსის ათვისების სფეროში. ის მოუწოდებს პეკინს, ჩაერთოს სტრატეგიული რისკის შემცირების თაობაზე დისკუსიაში. ნატოს 75 წლისთავთან დაკავშირებული საიუბილეო სამიტი 9-11 ივლისს იმართება ვაშინგტონში. ...