აშშ-ის ექსპრეზიდენტის, დონალდ ტრამპის განცხადებით, 2024 წლის არჩევნებზე მისი ვიცე-პრეზიდენტობის კანდიდატი იქნება ოჰაიოელი სენატორი ჯეიმს დევიდ - ჯეი დი - ვანსი. "ხანგრძლივი განხილვისა და ფიქრის, და ბევრი სხვა [კანდიდატის] უზარმაზარი ნიჭის გათვალისწინების შემდეგ, გადავწყვიტე, რომ პირი, რომელიც ყველაზე მეტად ესადაგება აშშ-ის ვიცე-პრეზიდენტის პოსტს, არის სენატორი ჯეი დი ვანსი, ოჰაიოს დიდებული შტატიდან", - წერს ტრამპი თავისი სოციალური ქსელით Truth-ი. მიმდინარე კვირაში ვისკონსინში დაიწყო რესპუბლიკური პარტიის ყრილობა, იმ მღელვარების ფონზე, რომელიც მოჰყვა ტრამპის მკვლელობის მცდელობას შაბათს. ამ განცხადების გამოქვეყნებიდან ერთ საათზე ნაკლებ დროში, ტრამპმა ყრილობის დელეგატების ხმების უმრავლესობა მოიპოვა და ის ოფიციალურად გამოცხადდა პრეზიდენტობის კანდიდატად. 39 წლის ვანსს საჯარო თანამდებობა არ ჰქონია 2022 წელს სენატში არჩევამდე. იგი ავტორია 2016 წელს გამოცემული ბესტსელერისა Hillbilly Elegy - ეს არის მემუარის ჟანრის წიგნი, რომელშიც ჯეი დი ვანსი აღწერს თავის ბავშვობას სამხრეთ-დასავლეთ ოჰაიოში, სადაც ქარხნები და ფაბრიკები 1980-იან და 1990-იან წლებში დაიხურა და რეგიონს მწვავე ეკონომიკური პრობლემები შეექმნა. წიგნი, რომელიც ასევე ეხებოდა ვანსის სამსახურს არმიასა და ერაყში, 2020 წელს ფილმს დაედო საფუძვლად. ვანსი წარსულში ეწინააღმდეგებოდა უკრაინისთვის დახმარების გამოყოფას. რამდენიმე თვის წინ, მან New York Times-ში საავტორო წერილი გამოაქვეყნა, რომელშიც წერს, რომ უკრაინისთვის მასშტაბური დახმარების გამოყოფის დამტკიცების მთავარი წინაღობა არ იყო აშშ-ის რესპუბლიკური პარტია, როგორც ამას პრეზიდენტი ჯო ბაიდენი აცხადებდა. "უკრაინას სჭირდება მეტი სამხედროები, ვიდრე ჰყავს, თუნდაც გაწვევის დრაკონული პოლიტიკის პირობებში. და მეტი აღჭურვილობა, ვიდრე აშშ-ის შეუძლია მიაწოდოს. უკრაინის მიმართ გატარებული ნებისმიერი პოლიტიკა მომავალში ამ რეალობით უნდა საზრდოობდეს", - წერდა ვანსი თავის სტატიაში. ...