ევროპარლამენტმა ხმათა უმრავლესობით დაამტკიცა განცხადება, რომელიც გმობს უნგრეთის პრემიერ-მინისტრ ვიქტორ ორბანს რუსეთში ბოლოდროინდელი ვიზიტის გამო. დოკუმენტი ორბანის მოსკოვში ვიზიტს ევროკავშირის საგარეო პოლიტიკის პრინციპების უხეშ დარღვევას უწოდებს. ევროპარლამენტარებმა ხაზგასმით აღნიშნეს, რომ ვიზიტი ორბანის პირადი ინიციატივა იყო და ის არ წარმოადგენდა ევროკავშირის ინტერესებს. ევროპარლამენტარებმა განაცხადეს, რომ უნგრეთი, როგორც ევროკავშირის ქვეყანა, უნდა დაისაჯოს მოსკოვში მისი ხელმძღვანელის ვიზიტისთვის, რომელიც არ იყო კოორდინირებული ევროკავშირთან. ვიქტორ ორბანი ივლისის დასაწყისში გამოუცხადებელი ვიზიტით იმყოფებოდა კიევსა და მოსკოვში. ის უკრაინის პრეზიდენტს, ვოლოდიმირ ზელენსკის და რუსეთის პრეზიდენტს, ვლადიმერ პუტინს შეხვდა. ასევე ნახეთ ორბანის „სამშვიდობო მისია“ რუსეთში და უკმაყოფილო მოკავშირეები უნგრეთის პრემიერ-მინისტრმა თავის ვიზიტებს "სამშვიდობო მისია" უწოდა და ისაუბრა ბუდაპეშტის შესაძლო შუამავლობაზე რუსეთსა და უკრაინას შორის მოლაპარაკებებში. მაგრამ სახელმწიფოს მეთაურებთან შეხვედრების შემდეგ, ორბანმა აღიარა, რომ პუტინი და ზელენსკი, ფაქტობრივად, შეურიგებელ პოზიციებზე დგანან. ასევე ნახეთ ვიქტორ ორბანი: მოსკოვი და კიევი ძალიან შორს არიან ერთმანეთისგან ევროპარლამენტმა თავის რეზოლუციაში აღნიშნა, რომ მხარს უჭერს ზელენსკის მიერ შემოთავაზებულ სამშვიდობო გეგმას და რომ სანამ ომი მიმდინარეობს, ევროკავშირი სტაბილურად დაუჭერს მხარს უკრაინას. დეპუტატებმა გაიხსენეს, რომ ორბანსა და პუტინს შორის მოლაპარაკებიდან სამი დღის შემდეგ, რუსმა ჯარებმა სარაკეტო თავდასხმები განახორციელეს კიევის “ახმატდეტის” ბავშვთა საავადმყოფოზე და ორ კერძო სამედიცინო ცენტრზე. იმ დღეს კიევში განხორციელებული იერიშის შედეგად 30-ზე მეტი ადამიანი დაიღუპა, მათ შორის ოთხი ბავშვი. ვიქტორ ორბანის მოსკოვსა და პეკინში მოლაპარაკებების შემდეგ, ევროკომისიამ ბოიკოტი გამოუცხადა უნგრეთის ექვსთვიან თავმჯდომარეობას. ევროკომისიის პრეზიდენტმა ურზულა ფონ დერ ლაიენმა გააუქმა უნგრეთში ევროკომისრების ვიზიტი. ისინი მონაწილეობას არც ევროკავშირის საბჭოს არაფორმალურ სხდომებში არ მიიღებენ. ფონ დერ ლაიენის გადაწყვეტილება 15 ივლისს, ღამით, გამოაცხადა ევროკომისიის წარმომადგენელმა ერიკ მამერმა. მისი ინფორმაციით, უნგრეთის თავმჯდომარეობის დაწყებასთან დაკავშირებული ბოლო მოვლენების გათვალისწინებით, პრეზიდენტმა გადაწყვიტა, რომ ევროკომისია წარმოდგენილი იქნება მაღალჩინოსანი სახელმწიფო მოხელეებით მხოლოდ საბჭოს არაოფიციალურ სხდომებზე. ...