დაღუპული 19 წლის რევი დემეტრაშვილია. შემთხვევა დღეს, 19 ივლისს, დაახლოებით 04:35 საათზე მოხდა. ამ დროისთვის არსებული ინფორმაციით, რევი დემეტრაშვილი გადაჭარბებული სიჩქარით მართავდა მოტოციკლს, საპატრულო პოლიციის თანამშრომლებს კი მისი გაჩერება სურდათ. პოლიციის მოთხოვნას ბაიკერი არ დაემორჩილა და გააგრძელა გადაადგილება ალექსანდრე ყაზბეგის გამზირის მიმართულებით. ამ დროს ის შეეჯახა საპატრულო პოლიციის მანქანას, რომელსაც პოლიციელი საგზაო მოძრაობის წესების დარღვევით მართავდა. ამ შემთხვევიდან რამდენიმე წუთში, ყაზბეგის გამზირზე ვიდეოგადაღება დაიწყო ერთ-ერთმა თვითმხილველმა გიორგი მოდებაძემ. პოლიციელის მოთხოვნის დაუმორჩილებლობისთვის ის მალევე ადმინისტრაციული წესით დააკავეს. მის მიერ გადაღებულ კადრებში ჩანს, რომ შემთხვევის ადგილიდან რამდენიმე მეტრის მოშორებით დგას, როცა მას პოლიციელები უახლოვდებიან. სწორედ ამ დროს წყდება ვიდეოგადაღება. შესაბამისად, არ არსებობს გიორგი მოდებაძესა და პოლიციელებს შორის კომუნიკაციის ამსახველი კადრები. როგორც წესი, ავტოსაგზაო შემთხვევებს შინაგან საქმეთა სამინისტრო იძიებს. საქმეზე გამოძიებას პროკურატურა მხოლოდ იმ შემთხვევაში ატარებს, თუ სავარაუდო დანაშაულში პოლიციელები ფიგურირებენ. პროკურატურამ გამოძიება სისხლის სამართლის კოდექსის 276-ე მუხლის მე-6 ნაწილით დაიწყო. 19 ივლისს, საღამოს კი, პრესსამსახურმა პოლიციელის დაკავების შესახებ ინფორმაცია გაავრცელა. დაკავებულია საპატრულო პოლიციის თანამშრომელი, რომელიც მართავდა ავტომობილს, რომელსაც ბაიკერი შეეჯახა. მას 4-დან 7 წლამდე პატიმრობა ემუქრება. მასალა განახლდა 20:10 საათზე, პროკურატურის განცხადების გავრცელების შემდეგ. ასევე ნახეთ დააკავეს პოლიციელი, რომლის მანქანაზე შეჯახებითაც ბაიკერი დაიღუპა ...