ხაშურში იუსტიციის სახლის გახსნის ღონისძიების შემდეგ, საქართველოს პრემიერ-მინისტრმა ირაკლი კობახიძემ ილაპარაკა ამერიკის შეერთებულ შტატებში დაგეგმილი საპრეზიდენტო არჩევნების შესახებ. კობახიძემ აქცენტი დასვა იმ მოსალოდნელ მოვლენებზე, რომლებიც, მისი აზრით, განვითარდება აშშ-ის საპრეზიდენტო არჩევნებში ყოფილი პრეზიდენტის, დონალდ ტრამპის გამარჯვების შემთხვევაში. მთავრობის მეთაური მიიჩნევს, რომ თუ ტრამპი გაიმარჯვებს, უკრაინაში ომი უფრო მალე დასრულდება. „ჩვენ, რა თქმა უნდა, ვერავის არჩევნებში ვერ ჩავერევით, მით უმეტეს, ამხელა ქვეყნის, აშშ-ის საპრეზიდენტო არჩევნებში ჩვენ ვერანაირად ვერ ჩავერევით. ეს არ არის ჩვენი საქმე. ერთადერთი, რაც შეიძლება ითქვას, ტრამპი თუ გაიმარჯვებს არჩევნებში, უკრაინაში ომი უფრო მალე დასრულდება. შესაბამისად, უფრო მალე დამშვიდდება ჩვენი რეგიონი, რაც შეცვლის დამოკიდებულებას კონკრეტულად საქართველოს მიმართაც. თუ იქნება მშვიდობა რეგიონში, საქართველოს მიმართ დამოკიდებულებაც შეიცვლება. ეს არის ერთადერთი, რაც შეიძლება ითქვას ამასთან დაკავშირებით. დანარჩენი არის ამერიკელი ხალხის არჩევანი. ამერიკელმა ხალხმა უნდა გადაწყვიტოს, ვინ იქნება მათი პრეზიდენტი, - თქვა კობახიძემ და დაამატა, - ოპოზიცია არა მხოლოდ აკრიტიკებდა ტრამპს, გახსოვთ როგორი უხეში, შეურაცხმყოფელი ტერმინებით მოიხსენიებდნენ ამერიკის ყოფილ პრეზიდენტს. დღეს მათი რიტორიკა შეიცვალა იმის გამო, რომ მათი გათვლებით, ტრამპი, დიდი ალბათობით, იგებს არჩევნებს, თუმცა ვერავინ დაივიწყებს იმ უხეშ რიტორიკას, რომელსაც ისინი იყენებდნენ წლების განმავლობაში. ტრამპის მოგების შემთხვევაში, უკრაინაში ომი უფრო მალე დასრულდება, ვიდრე სხვა შემთხვევაში დასრულდებოდა, შესაბამისად, რეგიონი უფრო მალე დამშვიდდება და ასეთ ვითარებაში საქართველოს მიმართ დამოკიდებულება შეიცვლება, იქნება მეტი სამართლიანობა საქართველოს მიმართ“. ტრამპის გამარჯვება უკრაინაში ომის დასრულების კონტექსტში ახსენა ბიძინა ივანიშვილმა 16 ივლისს, პარტია „ქართული ოცნების“ საარჩევნო კამპანიის დაწყების ღონისძიებაზე. მმართველი პარტიის საპატიო თავმჯდომარის თქმით, უკრაინაში ომის დამთავრების შემდეგ აშშ-სა და ევროკავშირის საქართველოსთან კონფლიქტზე აღქმა და ქვეყნის მიმართ ინტერესები შეიცვლება. „გლობალური ომის პარტია სარგებლობს მნიშვნელოვანი გავლენით დღევანდელ ამერიკულ და ევროპულ ბიუროკრატიაზე, რაც ქართულ საზოგადოებაში ქმნის განცდას, რომ საქართველოს კონფლიქტი აშშ-სთან და ევროკავშირთან აქვს, თუმცა, როგორც კი უკრაინაში ომი დასრულდება, ინტერესები შეიცვლება და ეს აღქმაც მყისიერად გაქრება“, - თქვა ივანიშვილმა. ასევე ნახეთ ივანიშვილის თქმით, უკრაინაში ომის დასრულების შემდეგ აშშ-სა და ევროკავშირთან საქართველოს კონფლიქტზე აღქმა შეიცვლება დღეს პრემიერ-მინისტ...