ამერიკის შეერთებული შტატების ვიცე-პრეზიდენტმა კამალა ჰარისმა დაადასტურა მანამდე მედიით გავრცელებული ცნობები, რომ მოიპოვა საკმარისი რაოდენობის დელეგატთა მხარდაჭერა იმისთვის, რომ დემოკრატიული პარტიის პრეზიდენტობის კანდიდატი გახდეს. ადგილობრივი დროით 22 ივლისს, ღამით, ჰარისმა განაცხადა, რომ ამაყობს ამ მხარდაჭერით და მოუთმენლად ელის უახლოეს ხანში ნომინაციის ოფიციალურად მიღებას. ვიცე-პრეზიდენტის თანახმად, მომდევნო თვეებში მთელ ქვეყანას მოივლის და აპირებს პარტიის და ნაციის გაერთიანებას და ნოემბერში დონალდ ტრამპის დამარცხებას. Associated Press-ის დათვლით, 22 ივლისის საღამოს მდგომარეობით ჰარისს მხარს უჭერდა 2 579 დელეგატი მაშინ, როცა პირველი ეტაპის კენჭისყრისას, სულ მცირე, 1 976 დელეგატის ხმაა საჭირო. დემოკრატი დელეგატების საჯარო განცხადებების და მათთან ინტერვიუების საფუძველზე ასეთივე მონაცემები ჰქონდა CNN-საც. დემოკრატიულმა პარტიამ პრეზიდენტობის კანდიდატი ოფიციალურად უნდა აირჩიოს ყრილობაზე, რომელიც 19 აგვისტოს ჩიკაგოში გაიხსნება. 22 ივლისს ჰარისი დელავერის შტატის ქალაქ უილმინგტონში შეხვდა საარჩევნო შტაბის თანამშრომლებს და განაცხადა, რომ არჩევნებამდე მძიმე სამუშაო ელით. შეხვედრაში ტელეფონით მონაწილეობდა პრეზიდენტი ჯო ბაიდენი, რომელსაც კორონავირუსის გამო თვითიზოლაცია დასჭირდა. ბაიდენმა საარჩევნო შტაბის თანამშრომლებს მადლობა გადაუხადა და უთხრა, რომ მეორე ვადით კენჭისყრაზე უარი სწორი გადაწყვეტილება იყო, თუმცა არსად მიდის და საარჩევნო კამპანიაში ისევ სრულად იქნება ჩართული. ასევე ნახეთ ბაიდენმა კანდიდატურა მოხსნა, ჰარისი კამპანიას იწყებს - რა მოხდება ახლა? პრეზიდენტმა ჯო ბაიდენმა 21 ივლისს გამოაცხადა, რომ დემოკრატიული პარტიის და ქვეყნის ინტერესების გამო საარჩევნო მარათონს ეთიშება, პრეზიდენტად კენჭს აღარ იყრის და მხარს კამალა ჰარისის კანდიდატურას უჭერს. 27 ივნისის შემდეგ, როცა ჯო ბაიდენს რესპუბლიკელების კანდიდატ დონალდ ტრამპთან პირველი წარუმატებელი დებატები ჰქონდა, აშშ-ის პრეზიდენტს არაერთმა დემოკრატმა მოუწოდა, უარი ეთქვა მეორე ვადით კენჭისყრის განზრახვაზე. დემოკრატები შიშობდნენ, რომ 81 წლის ბაიდენი თავისი ასაკის და ჯანმრთელობის მდგომარეობის გამო ვერ შეძლებდა ტრამპთან წარმატებით ბრძოლას, ხოლო გამარჯვების შემთხვევაში, კიდევ ოთხი წლით ეფექტიანად მუშაობა გაუჭირდებოდა. 21 ივლისამდე ჯო ბაიდენი აცხადებდა, რომ საარჩევნო მარათონიდან გასვლას არ აპირებდა. აშშ-ის პრეზიდენტის არჩევნებში, რომელიც 5 ნოემბერს ჩატარდება, რესპუბლიკური პარტიის კანდიდატია ყოფილი პრეზიდენტი,78 წლის დონალდ ტრამპი. 22 ივლისს მან CNN-ს განუცხადა, რომ ჰარისს ბაიდენზე უფრო მარტივად დაამარცხებს. ასევე ნახეთ დონალდ ტრამპი ოფიციალურად გახდა რესპუბლიკელების პრეზიდენტობის კანდიდატი ...