ოკუპირებულ ცხინვალის რეგიონთან მდებარე გორის სოფელ ერგნეთში ინციდენტების პრევენციის და მათზე რეაგირების მექანიზმის (IPRM) ფარგლებში 120-ე შეხვედრა მიმდინარეობს. ფორმატში, რომელიც 2008 წლის რუსეთ-საქართველოს ომის შემდეგ შეიქმნა, მონაწილეობენ საქართველოს ცენტრალური მთავრობის, ცხინვალის დე ფაქტო ხელისუფლების და რუსეთის საოკუპაციო ძალების, ევროკავშირის, ეუთოსა და გაეროს წარმომადგენლები. სამუშაო შეხვედრაზე ქართული მხარე ორ ძირითად საკითხს აყენებს: ოკუპირებულ ტერიტორიაზე უკანონოდ დაკავებული საქართველოს მოქალაქეების გათავისუფლება და ე.წ. ბორდერიზაციის შემთხვევები. ირაკლი ანთაძემ, საქართველოს სახელმწიფო უსაფრთხოების სამსახურის ანალიტიკური დეპარტამენტის დირექტორის მოადგილემ, შეხვედრის დაწყებამდე ჟურნალისტებს უთხრა, რომ დღეის მდგომარეობით, ოკუპირებულ ცხინვალის რეგიონში უკანონო პატიმრობაში საქართველოს რვა მოქალაქეა. „მთავარი აქცენტი გაკეთდება იმაზე, რომ მათ მიმართ იყოს გამოყენებული ჰუმანიტარული მიდგომა და ისინი დაუბრუნდნენ საკუთარ ოჯახებს“, - აღნიშნა მან. ანთაძემ ილაპარაკა რამაზ ბეღელურის შესახებაც, რომელსაც 20 ივლისს დე ფაქტო სასამართლომ, ე.წ. საზღვრის დარღვევის ბრალდებით, რვა თვით თავისუფლების აღკვეთა მიუსაჯა. „რამაზ ბეღელურთან დაკავშირებით, ისევე როგორც ყველა დანარჩენ უკანონო პატიმრებთან დაკავშირებით, „ცხელი ხაზით“ არის პერმანენტული კომუნიკაცია, ყოველდღიური და რიგ შემთხვევებში დღეში რამდენჯერმე. პროცესს თვალს ადევნებენ ჩვენი საერთაშორისო პარტნიორები. რაც შეეხება რამაზ ბეღელურის ჯანმრთელობის მდგომარეობას, მისი სტატუსი ყოველთვის მოწმდება. ბოლოს მიღებული ინფორმაციით, ბეღელურის ჯანმრთელობა იყო დამაკმაყოფილებელი. მისთვის ე.წ. სასჯელის მისჯა კი არის უკანონო ქმედება და ამაზე განმარტებების მოსმენას ვაპირებთ დღევანდელ შეხვედრაზე“, - უთხრა ჟურნალისტებს ირაკლი ანთაძემ. ასევე ნახეთ ოკუპირებული ცხინვალის ე.წ. სასამართლომ საქართველოს მოქალაქეს 8-თვიანი პატიმრობა მიუსაჯა საოკუპაციო ძალების სხვა ქმედებების შესახებ კი სუსის წარმომადგენელმა თქვა, რომ 16 მაისიდან (22 ივლისის მდგომარეობით) უკანონო „ბორდერიზაციის“ რვა შემთხვევა დაფიქსირდა. „რვა შემთხვევიდან მაისში დაფიქსირდა ხუთი, ივნისში - სამი. ამ პროცესმა მოიცვა გორისა და ქარელის მუნიციპალიტეტები, ასევე - დუშეთის მუნიციპალიტეტი, გრემისხევის მიმდებარე ტერიტორია. რაც შეეხება აქტივობას, სრული სპექტრით იქნა წარმოდგენილი ეს უკანონო აქტივობები. ვგულისხმობ როგორც ადრე აღმართულ უკანონო ინსტალაციების გამაგრება-შეკეთებას, ასევე ახლის მონტაჟს. ახალი ინსტალაციები დამონტაჟდა გორისა და ქარელის მუნიციპალიტეტებში. ეს არის ძირითადად სოფელ კოდის მიმართულება, ასევე დაფიქსირებული იყო ოკუპირებული წნელისის მიმართულებით გარკვეული ტიპი...