აშშ-ის საიდუმლო სამსახურის დირექტორმა კიმბერლი ჩიტლმა უარყო ორივე პარტიის მოწოდებები, დატოვოს თანამდებობა უსაფრთხოების დარღვევების გამო, რის შედეგადაც 13 ივლისს პოტენციურმა მკვლელმა მოახერხა რესპუბლიკელი საპრეზიდენტო კანდიდატის, დონალდ ტრამპის დაშავება. კონგრესმენები აშშ-ის საიდუმლო სამსახურის დირექტორს 22 ივლისს ოთხ-ნახევარ საათზე მეტი ხნის განმავლობაში უსვამდნენ მწვავე შეკითხვებს. თავის გამოსვლაში ჩიტლმა 13 ივლისს მომხდარ სროლას უწოდა "საიდუმლო სამსახურის ყველაზე მნიშვნელოვანი ოპერატიული წარუმატებლობა ბოლო ათწლეულებში" და ეს ინციდენტი შეადარა აშშ-ის პრეზიდენტ რონალდ რეიგანის მკვლელობის მცდელობას 1981 წელს. დონალდ ტრამპის მკვლელობის მცდელობა 13 ივლისს პენსილვანიაში, ქალაქ ბატლერში, მოხდა. აშშ-ის ექსპრეზიდენტს რამდენჯერმე ესროლეს, ერთი ტყვია პოლიტიკოსს ყურში მოხვდა. თავდასხმის შედეგად დაიღუპა მიტინგის ერთი მონაწილე, ორი კი დაიჭრა. 20 წლის ტომას მეთიუ კრუქსი, რომელმაც ტრამპს ესროლა, აშშ-ის საიდუმლო სამსახურის სნაიპერმა მოკლა. აშშ-ის საკანონმდებლო ორგანოში გამართულ მოსმენაზე კიმბერლი ჩიტლმა ინციდენტის დეტალების მიწოდებაზე უარი უთხრა კონგრესის წევრებს, რამაც მათი უკმაყოფილება გამოიწვია. წარმომადგენელთა პალატის ზედამხედველობის კომიტეტის რესპუბლიკელმა თავმჯდომარემ ჯეიმს კომერმა და წამყვანმა დემოკრატმა ჯეიმი რასკინმა, რომლებიც, როგორც წესი, კატეგორიულად არ ეთანხმებიან ერთმანეთს უმეტეს საკითხში, კიმბერლი ჩიტლს გადადგომისკენ მოუწოდეს. რასკინმა თქვა, რომ ჩიტლმა "დაკარგა კონგრესის ნდობა ქვეყნის ისტორიაში ძალიან მნიშვნელოვან და დელიკატურ მომენტში." განხილვის დროს კიმბერლი ჩიტლმა არაერთხელ უარყო მოწოდებები გადადგომის შესახებ და აღნიშნა, რომ "საკუთარ თავს მიიჩნევს საუკეთესო ხელმძღვანელად, ვისაც დღევანდელ დღეს საიდუმლოს სამსახურის გაძღოლა შეუძლია“. ორშაბათის მოსმენა პირველი იყო დონალდ ტრამპის მკვლელობის მცდელობასთან დაკავშირებით დაგეგმილ საზედამხედველო განხილვათა სერიიდან. აშშ-ის გამოძიების ფედერალური ბიუროს (FBI) დირექტორი კრისტოფერ რეი ოთხშაბათს წარდგება წარმომადგენელმა პალატის იუსტიციის კომიტეტის წინაშე. სააგენტო “რეიტერის” თანახმად, წარმომადგენელთა პალატის სპიკერი მაიკ ჯონსონი, სავარაუდოდ, შექმნის ორპარტიულ სამუშაო ჯგუფს, რომელიც გამოძიებაში ჩაერთვება. ასევე ნახეთ "მე ტყვია დემოკრატიის გამო მივიღე" - ტრამპმა თავდასხმის შემდეგ პირველი წინასაარჩევნო შეხვედრა გამართა ასევე ნახეთ ბაიდენი მოითხოვს, გააანალიზონ ტრამპზე თავდასხმის დროს არსებული უსაფრთხოების ზომები და დაადგინონ მოტივი ...