მოსკოვის სასამართლომ საერთაშორისო ანტიკორუფციული ფონდის ხელმძღვანელი მარია პევჩიხი 30 ათასი რუბლით დააჯარიმა „უცხოეთის აგენტის“ საქმიანობის შესახებ ანგარიშის წარმოდგენაზე უარისთვის. ამის შესახებ მოსკოვის საერთო იურისდიქციის სასამართლოს პრესსამსახური იტყობინება. „მედიაზონის“ ცნობით, პევჩიხის მიმართ ეს არის პირველი ოქმი ამ მუხლით. ერთი წლის განმავლობაში ორი ჯარიმის ძალაში შესვლის შემდეგ რუსეთის ხელისუფლებამ შესაძლოა სისხლის სამართლის საქმე აღძრას. რუსეთში პევჩიხის წინააღმდეგ უკვე აღძრულია რამდენიმე სისხლის სამართლის საქმე. მას ბრალად ედება რუსეთის არმიის შესახებ პოლიტიკური სიძულვილით მოტივირებული „ფეიკების“ გავრცელება, ექსტრემისტული თემის საქმიანობის ორგანიზება სამსახურებრივი მდგომარეობის გამოყენებით და ვანდალიზმი. 2024 წლის იანვარში მოსკოვის სასამართლომ პევჩიხი დაუსწრებლად დააპატიმრა. რუსეთის ხელისუფლებამ პევჩიხი 2023 წლის მაისში ცნო „უცხოეთის აგენტად“. ამ გადაწყვეტილების ერთ-ერთი გამართლება იყო პევჩიხის მოწოდებები რუსეთის ამჟამინდელი ხელისუფლების დამხობის შესახებ, აღნიშნა იუსტიციის სამინისტრომ. „გამოვდიოდი მოწოდებებით და კვლავაც გამოვალ“, - ასე გამოეხმაურა მაშინ ახალ სტატუსს პევჩიხი. ასევე ნახეთ პევჩიხი: ნავალნი მოკლეს ხანგოშვილის მკვლელში გაცვლის ჩასაშლელად „უცხოეთის აგენტის“ სტატუსის მქონე, სხვა საკითხებთან ერთად, ვალდებულია კვარტალურად წარმოადგინოს ინფორმაცია თავის პირად ანგარიშებზე თანხების მოძრაობის შესახებ და ყველა საჯარო შეტყობინებას გაუკეთოს მარკირება, რომ ის „უცხოეთის აგენტს“ ეკუთვნის. ანგარიშში შეცდომები ან მარკირების არარსებობა ისჯება თავისუფლების აღკვეთით. კანონის მიხედვით, ანგარიშები იუსტიციის სამინისტროს ვებსაიტზე უნდა იყოს ატვირთული, თუმცა დეპარტამენტს ჯერაც არ შეუქმნია სათანადო პორტალი. საერთაშორისო ანტიკორუფციული ფონდი, რომლის ხელმძღვანელიცაა მარია პევჩიხი, ოპოზიციონერმა პოლიტიკოსმა ალექსეი ნავალნიმ დააარსა. ნავალნი წელს თებერვალში გარდაიცვალა პატიმრობაში. მისი თანამებრძოლებისა და ახლობლების აზრით, ის მოკლეს. ...