პრემიერ-მინისტრი ირაკლი კობახიძე, განათლების მინისტრ გიორგი ამილახვართან ერთად, საქართველოს მთავრობის ადმინისტრაციაში შეხვდა ქუთაისის საერთაშორისო უნივერსიტეტის ახალდანიშნულ რექტორს, გიორგი ხუბუას. ინფორმაციას მთავრობის ადმინისტრაცია ავრცელებს. „შეხვედრისას საუბარი შეეხო გეგმებს ქუთაისის საერთაშორისო უნივერსიტეტში ახალი საგანმანათლებლო პროგრამების განვითარების მიმართულებით. პრემიერმა უნივერსიტეტის ახალ რექტორს წარმატებები უსურვა და მთავრობის სახელით მხარდაჭერა აღუთქვა“, - წერია ოფიციალურ ცნობაში. გიორგი ხუბუა 2006-2010 წლებში ივანე ჯავახიშვილის სახელობის თბილისის სახელმწიფო უნივერსიტეტის რექტორი იყო. მის გადადგომას წინ უძღოდა უნივერსიტეტის ბიბლიოთეკიდან რარიტეტული წიგნების დაკარგვასთან დაკავშირებული მოვლენები. ხუბუა კატეგორიულად უარყოფდა მისი რექტორობის დროს წიგნების დაკარგვას. გარდა ამისა, უნივერსიტეტის რამდენიმე თანამშრომელი ხუბუას ხელფასების არასამართლიან გადანაწილებაში ადანაშაულებდა. ქუთაისის საერთაშორისო უნივერსიტეტი (KIU) პარტია „ქართული ოცნების“ საპატიო თავმჯდომარის, ბიძინა ივანიშვილის საქველმოქმედო ფონდის, „ქართუს“ დაფუძნებულია. დღეისათვის უნივერსიტეტში 1200-ზე მეტი სტუდენტი სწავლობს. უნივერსიტეტის ვებსაიტზე KIU-ს რექტორად ჯერ ისევ პროფესორი ალექსანდრე თევზაძეა მითითებული. ...