ყოფილი აზერბაიჯანელი დიპლომატის, ემირ იბრაჰიმოვის ნათესავებისა და ადვოკატის თქმით, პოლიციამ გუშინ დააკავა ის. იბრაჰიმოვს, რომელიც მთავრობის კრიტიკოსად არის ცნობილი, ბრალად ედება ცივი იარაღით ჭრილობის მიყენება, რასაც იბრაჰიმოვი აბსოლუტურ ტყუილს უწოდებს. როგორც იბრაჰიმოვის ადვოკატმა აქილ ლაიიკმა თქვა, მისმა კლიენტმა მას უთხრა, რომ 22 ივლისს საღამოს ბაქოში, მეტროს სადგურის მახლობლად, მას თავს დაესხა უცნობი პირი. ამის შემდეგ მასთან გაჩნდა სამოქალაქო ტანსაცმელში გამოწყობილი რამდენიმე ადამიანი და ის ნიზამის რაიონის პოლიციის განყოფილებაში წაიყვანეს. „დიპლომატის დაკავება ახალ ტენდენციას ჰგავს. ემინ იბრაჰიმოვმა თქვა, რომ ის პროვოკაციის მსხვერპლია. ის უარყოფს ბრალდებას და აცხადებს, რომ არ ჩაუდენია დანაშაული, რომელშიც ედება ბრალი“, - თქვა ლაიიკმა და დასძინა, რომ სასამართლომ დაკავებიდან 48 საათში უნდა განუსაზღვროს მის კლიენტს წინასწარი დაკავების ფორმა. ლაიიკის თანახმად, იბრაჰიმოვმა მას უთხრა, რომ პოლიციამ ელექტროშოკის მოწყობილობა გამოიყენა მის წინააღმდეგ, რათა ეიძულებინათ, ტელეფონის პაროლი ეთქვა მათთვის. აზერბაიჯანის შინაგან საქმეთა სამინისტრომ დაადასტურა იბრაჰიმოვის დაკავება და განაცხადა, რომ ის დააკავეს მას შემდეგ, რაც მან ჩხუბის დროს ცივი იარაღით ჭრილობა მიაყენა 1987 წელს დაბადებულ პირს, რომლის ვინაობას არ ასახელებენ. სამინისტროს თანახმად, დაჭრილი პირი საავადმყოფოში მოათავსეს. დამნაშავედ ცნობის შემთხვევაში იბრაჰიმოვს რვა წლამდე თავისუფლების აღკვეთა ემუქრება. ...