რუსეთის სამხედრო დაზვერვის სპეციალური ქვედანაყოფი ევროპაში აწყობს დივერსიულ აქტებს, აგროვებს შემსრულებლებს Telegram-ისა და TikTok-ის საშუალებით და მათ კრიპტოვალუტით უხდის. ამის შესახებ ლაპარაკია ცენტრ „დოსიეს“ გამოძიებაში. პუბლიკაციის ავტორები იუწყებიან, რომ მათ წვდომა მოიპოვეს ქვედანაყოფის დოკუმენტებზე. „დოსიე“ გრუ-ს სტრუქტურას უწოდებს „ჯგუფების წამყვან აგენტებს“. მათ, სავარაუდოდ, პოლკოვნიკი დენის სმოლიანინოვი ხელმძღვანელობს. დოსიეს მიხედვით, 2024 წლის დამდეგს მათ Telegram-ის საშუალებით გადაიბირეს ლატვიის მკვიდრი, რომელმაც, ინსტრუქციების მიხედვით, მოლოტოვის კოქტეილი ესროლა რიგის ოკუპაციის მუზეუმს. იგივე გუნდი იდგა აქციის უკან 2023 წლის ბოლოს, როდესაც ღაზის სექტორში სამხედრო ოპერაციის ფონზე მოლდოვის რამდენიმე მოქალაქემ დავითის ვარსკვლავები დახატა პარიზსა და მის შემოგარენში მდებარე შენობებზე. გამოძიებაში ნათქვამია, რომ ისინი TikTok-ის მეშვეობით დაიქირავეს. სმოლიანინოვის გუნდი აგენტებს იბირებს სამუშაოს მაძიებელთა ჩეტების საშუალებით; პრორუს აქტივისტებს შორის; კრიმინალთან დაკავშირებულ ადამიანებში ან რადიკალებში - როგორც მემარჯვენე, ისე მემარცხენეთა შორის. „დოსიეს“ წყაროები ირწმუნებიან, რომ გრუ-ს ასევე დივერსიებისთვის აჰყავს დანაშაულებრივი სამყაროს წარმომადგენლები რუსეთიდან, უკრაინიდან, საქართველოდან, სომხეთიდან, მოლდოვიდან და სერბეთიდან და პოტენციურ შემსრულებლებს შსს-ს ოპერატიული თანამშრომლების მეშვეობით აგროვებს. ამ აგენტებს ზოგჯერ ევროკავშირის პასპორტებიც აქვთ. 2024 წლის პირველ ნახევარში ევროპაში ათზე მეტი ადამიანი დააკავეს რუსეთის მიერ შეკვეთილი დივერსიის განხორციელების ან მომზადების ბრალდებით. მოსკოვი კატეგორიულად უარყოფს მსგავს ბრალდებებს. ...