გერმანიაში, ბაიროითში, იწყება სახელგანთქმული რიხარდ ვაგნერის მუსიკის ფესტივალი. 25 ივლისს ფესტივალი იხსნება ოპერის, „ტრისტან და იზოლდას“ ახალი ინსცენირებით, რომელიც ეკუთვნის ოპერისა და თეატრის ისლანდიელ რეჟისორს, თორლაიფურ იორნ არნარსონს. წარმოდგენის მუსიკალური ხელმძღვანელია დირიჟორი სემიონ მიჩკოვი, 1975 წელს აშშ-ში ემიგრირებული, წარმოშობით რუსი მუსიკოსი, რომელიც სხვათა შორის არის ჩეხეთის ფილარმონიის მთავარი დირიჟორი. ბაიროითში სტუმართა შორისაა გერმანიის კულტურის მინისტრი კლაუდია როთი, მწვანეთა პარტიის წარმომადგენელი, რომლის გამონათქვამს, რომ ვაგნერის ფესტივალზე სხვა კომპოზიტორების ნაწარმოებებიც უნდა შესრულდეს, კამათი მოჰყვა. ახლა მან გამონათქვამი შეარბილა და განაცხადა, რომ ფესტივალის რეპერტუარს სამხატვრო ხელმძღვანელობა განსაზღვრავს და არა კულტურის უწყება. თუმცა მინისტრმა შეკითხვა დასვა, რა უნდა გაკეთდეს იმისთვის, რომ ბაიროითმა და ბევრმა სხვა ამგვარმა ინსტიტუტმა მომავლის პუბლიკა მიიზიდოს. ბაიროითის ანუ რიხარდ ვაგნერის ფესტივალი ეძღვნება ვაგნერის ბოლო ათ ოპერას. ფესტივალი 1876 წლიდან იმართება შესვენებებით. ასევე ნახეთ იშვიათი ხმის მფლობელი - ნანიკო ძიძიგური ...