სპეციალურმა საგამოძიებო სამსახურმა „მთავარი არხის“ ჟურნალისტსა და ოპერატორზე ძალადობის ფაქტზე ორი პირი დააკავა. საქმეზე გამოძიება თავდაპირველად დაიწყო სისხლის სამართლის კოდექსის 154-ე მუხლის პირველი პუნქტით, რაც გულისხმობს ჟურნალისტისათვის პროფესიულ საქმიანობაში უკანონოდ ხელის შეშლას. ეს პუნქტი სასჯელის სახით თავისუფლების აღკვეთას არ ითვალისწინებს და მისი უმაღლესი სანქცია ექვსი თვიდან ორ წლამდე შინაპატიმრობაა. 26 ივლისს გამოქვეყნებულ განცხადებაში წერია, რომ ორი პირი სისხლის სამართლის კოდექსის 156-ე მუხლის მე-2 ნაწილის „ა“ ქვეპუნქტით გათვალისწინებული დანაშაულისთვის დააკავეს, რაც ითვალისწინებს ადამიანის დევნას მის პროფესიულ მოღვაწეობასთან დაკავშირებით. დანაშაული კი სამ წლამდე თავისუფლების აღკვეთით ისჯება. გამოძიების ინფორმაციით, „2024 წლის 25 ივლისს, დილის საათებში ტელეკომპანია „მთავარი არხის“ ჟურნალისტი ვლადიმერ მენაბდე და ოპერატორი მანუჩარ მჟავანაძე ლანჩხუთის მუნიციპალიტეტ სოფელ სუფსაში, ჟურნალისტურ საქმიანობას ახორციელებდნენ, რეპორტაჟზე მუშაობის დროს, ბრალდებულმა ვ.ი-მ, მათ მიაყენა სიტყვიერი და ფიზიკური შეურაცხყოფა. ამავე დროს ჟურნალისტს ფიზიკური შეურაცხყოფა მიაყენა ვ.ი-ს ძმამ, ა.ი-მ, რომელმაც რამდენჯერმე დაარტყა მუშტი თავისა და სახის არეში, რის შედეგადაც ვლადიმერ მენაბდემ განიცადა ფიზიკური ტკივილი და მიიღო დაზიანება ტუჩის არეში. ა.ი-მ, ასევე, დააზიანა ტელეკომპანია „მთავარი არხის“ ვიდეო კამერა და სიტყვიერი შეურაცხყოფა მიაყენა ჟურნალისტსა და ოპერატორს“. „მთავარი არხი“ ხელისუფლების ყველა შესაბამის ორგანოს გურიის ბიუროს ჟურნალისტებზე თავდასხმის ფაქტის დაუყოვნებლივ გამოძიებისა და თითოეული დამნაშავის პასუხისგებაში მიცემისკენ მოუწოდებდა. ...