უკრაინის პრეზიდენტის ოფისის ხელმძღვანელის მრჩეველმა მიხაილო პოდოლიაკმა რუსეთთან სამშვიდობო შეთანხმება "ეშმაკთან გარიგებას" შეადარა და განაცხადა, რომ ასეთი შეთანხმებით რუსეთი დროს მოიგებს და გააგრძელებს თავისი არმიის მოდერნიზებას. “თუ დღეს თქვენ რაიმეს მოაწერთ ხელს რუსეთთან, რომელიც არ დამარცხდება ამ ომში და არ დაეკისრება პასუხისმგებლობა მასობრივი დანაშაულისათვის, ეს ნიშნავს, რომ თქვენ ხელი მოაწერეთ ბილეთს, რომ გაგრძელდეს ომი სხვა მასშტაბით, სხვა მთავარი მოქმედი პირებით, სხვა დაღუპული და ნაწამები ადამიანებით“, - განაცხადა მიხაილო პოდოლიაკმა „ასოშიეტიდ პრესთან“ ინტერვიუში. პოდოლიაკის ამ განცხადების ფონია უკრაინის ომის სამშვიდობო მოწესრიგებაში რუსეთის შესაძლო მონაწილეობაზე ბოლო ხანს გაკეთებული მინიშნებები. უფრო ადრე, უკრაინის პრეზიდენტმა ვოლოდიმირ ზელენსკიმ თქვა, რომ აუცილებელია რუსეთზე მთელი მსოფლიოს ზეწოლა, რათა ის მოლაპარაკების მაგიდასთან დასვან ომის შეწყვეტის შესაძლებლობის განსახილველად. უკრაინის პრეზიდენტი არ ფიქრობს, რომ ყველა ტერიტორიას აუცილებლად ძალის გამოყენებით დაიბრუნებენ. „ვფიქრობ, დიპლომატიის ძალას დახმარება შეუძლია“, - განაცხადა ვოლოდიმირ ზელენსკიმ. ჩეხეთის პრეზიდენტი პეტრ პაველიც მიიჩნევს, რომ აუცილებელია რუსეთის ფედერაციისა და ჩინეთის ჩაბმა უკრაინაში მიმდინარე ომის სამშვიდობო მოლაპარაკებების პროცესში, რათა შედეგი გარანტირებული იყოს. იმავდროულად, ჩეხეთის პრეზიდენტმა ხაზგასმით განაცხადა, რომ მოლაპარაკებებს აზრი არც იმ შემთხვევაში არ ექნება, თუ მოსკოვი არ შეცვლის მიდგომას და ფაქტობრივად უკრაინის კაპიტულაციისკენ მიმართულ მოთხოვნებს წამოაყენებს. მიმდინარე წლის ივნისის დასაწყისში, ვლადიმირ პუტინმა განაცხადა, რომ რუსეთი უკრაინაში ცეცხლს შეწყვეტს და მზად იქნება, სამშვიდობო მოლაპარაკებები დაიწყოს, როგორც კი უკრაინა მთლიანად გაიყვანს ჯარებს დონეცკის, ლუგანსკის, ზაპოროჟიესა და ხერსონის რეგიონებიდან და უარს იტყვის ნატოში გაწევრიანებაზე. პუტინმა სამშვიდობო ხელშეკრულების პირობებად დაასახელა რუსეთის მიერ ყირიმისა და უკრაინის ოთხი რეგიონის ანექსიის საერთაშორისო აღიარება და უკრაინის ნეიტრალური და ბირთვული იარაღისგან თავისუფალი სტატუსი. ამასთან, მშვიდობიანი მოწესრიგების პროცესში დასავლეთის ქვეყნებმა, რუსეთის პრეზიდენტის თქმით, უნდა მოხსნან მოსკოვის წინააღმდეგ დაწესებული ყველა სანქცია. პუტინის ეს ხედვა საფუძველშივე ეწინააღმდეგება უკრაინის პრეზიდენტ ვოლოდიმირ ზელენსკის ათპუნქტიან “სამშვიდობო ფორმულას”, რომელიც, სხვა საკითხებს შორის, მოიცავს რუსეთის ძალების გასვლას უკრაინიდან და უკრაინის ტერიტორიული მთლიანობის აღდგენას. ასევე ნახეთ ზელენსკი: თუ დასავლეთი ისევ ძლიერი იქნება, ომის „ცხელი ფაზა“ შესაძლოა წლის ბოლომდე დასრულდეს ასევე ნახეთ ვიქტო...