ათასობით სპორტსმენი, ოლიმპიადის მონაწილე სახელმწიფოთა გუნდების წევრები, სხვადასხვა ზომის გემებზე მიესალმა მაყურებელს პარიზის ცენტრში მდინარე სენაზე. ოლიმპიური თამაშების გახსნის დღემდე არნახული ცერემონია გაიმართა 26 ივლისს საღამოს პარიზის ცენტრში. ცერემონია, რომელიც საფრანგეთმა გადაწყვიტა წარმოედგინა, შეფასდა როგორც უპრეცედენტო და მაღალი რისკის მქონე. აღლუმში მონაწილე 7500-მდე სპორტსმენმა, ფლოტილიით - გემებზე - მდინარე სენის 6-კილომეტრიან მონაკვეთზე, აუსტერლიცის ხიდიდან იენის ხიდამდე, ჩაუარეს მაყურებელს. ცნობილი თეატრალური ექსპერიმენტალისტის თომას ჟოლის მიერ დადგმული შოუ, საფრანგეთის ისტორიის, მრავალსაუკუნოვანი ტრადიციებისა და კულტურის მნიშვნელოვან პერიოდებს აღნიშნავდა. სპორტსმენების ჯგუფმა აანთო ოლიმპიური ცეცხლი საჰაერო ბურთზე, რომელიც ცაში აფრინდა. ცერემონიის განსაკუთრებული მოვლენა იყო განთქმული კანადელი მომღერლის სელინ დიონის მონაწილეობა, რომელიც დაუბრუნდა სცენას ოთხწლიანი ავადმყოფობის შემდეგ. პარიზის შოუს თვალყურს ადევნებდნენ 300,000 გულშემატკივარი და საპატიო სტუმრები მთელი მსოფლიოდან. საქართველოს გუნდში ამჯერად 28 ოლიმპიელია, მათგან 7 - ქალი. три 2024 წლის თამაშები, რომელიც ოფიციალურად 26 ივლისს გაიხსნა, 11 აგვისტომდე გასტანს და ძირითადი შეჯიბრებები პარიზში მოეწყობა, სპორტული ასპარეზობა გაიმართება საფრანგეთის არაერთ სხვა ქალაქში, ხოლო სერფინგის მოყვარულებს სპორტის ამ სახეობაში შეჯიბრების თვალყურის დევნება საფრანგეთის პოლინეზიაში, ტაიტიზე მოუწევთ. 24 ივლისიდან უკვე გაიმართა წინასწარი პაექრობა ოთხ სახეობაში. სულ, პარიზის ოლიმპიადაში მონაწილეობს 206 ქვეყნის 10 ათასზე მეტი სპორტსმენი, რომლებიც ერთმანეთს შეეჯიბრებიან 32 სახეობასა და 48 ქვესახეობაში. პარიზმა ოლიმპიურ თამაშებს უკვე ორჯერ უმასპინძლა, 1900 და 1924 წლებში. ზამთრის თამაშები საფრანგეთში ასევე სამჯერ, 1924, 1968 და 1992 წლებში ჩატარდა. ...