უკრაინის მთავარი სადაზვერვო სამმართველო (გურ) აცხადებს, რომ უპილოტო საფრენმა აპარატებმა შაბათს იერიში განახორციელეს ოლენიას აეროდრომის წინააღმდეგ რუსეთის უკიდურეს ჩრდილოეთში, მურმანსკის ოლქში, და მოარტყეს შორი მანძილის სტრატეგიულ ბომბდამშენ ტუ-22M3-ს. ამის შესახებ უკრაინული მედია წერს დაზვერვის მთავარი სამმართველოს წყაროზე დაყრდნობით. ჯერჯერობით არ მოიპოვება დამოუკიდებელი დადასტურება, რომ ასეთი დარტყმა განხორციელდა. თუ დრონები მართლაც უკრაინის ტერიტორიიდან გაუშვეს და მათ მიაღწიეს აეროდრომამდე, რომელიც არქტიკული წრის მიღმა, ქალაქ ოლენეგორსკის მახლობლად მდებარეობს, მაშინ საქმე ეხება რუსეთის ობიექტების წინააღმდეგ უკრაინული უპილოტო საფრენი აპარატების გამოყენების რეკორდს. მანამდე გურ-ი აცხადებდა, რომ უკრაინული დრონები თავს დაესხნენ სამიზნეებს ორენბურგის რეგიონში და ბაშკირეთში. უკრაინიდან ამ რეგიონებამდე დაახლოებით 1500 კილომეტრია, ოლენეგორსკამდე კი - დაახლოებით 1800. ოლენიას აეროდრომზე განლაგებული თვითმფრინავები რეგულარულად მონაწილეობენ უკრაინის წინააღმდეგ იერიშებში. უკრაინის შეიარაღებული ძალების დაზვერვის მთავარმა სამმართველომ ასევე განაცხადა, რომ, მურმანსკის ოლქის აეროდრომის გარდა, უკრაინის სამხედრო დაზვერვის დრონებმა რუსეთში იერიში მიიტანეს კიდევ ორ სამხედრო აეროდრომზე - სარატოვის ოლქში ენგელსში და რიაზანის ოლქში დიაგილევოში, ასევე ნავთობგადამამუშავებელ ქარხანაზე რიაზანში. ასევე ნახეთ გეოლოკაცია ადასტურებს უკრაინის დაზვერვის ცნობას რუსეთის ვერტმფრენებზე იერიშის შესახებ რუსეთის თავდაცვის სამინისტრომ ირიბად აღიარა დარტყმები მხოლოდ ბოლო ორ სამიზნეზე. რუსეთის სამხედრო უწყების ცნობით, 26 ივლისს ღამით საჰაერო თავდაცვის ძალებმა ჩამოაგდეს უკრაინული დრონები, მათ შორის რიაზანის ოლქის თავზე. ცნობაში არ იყო ნახსენები სარატოვი და მურმანსკი. რიაზანის მოსახლეები იტყობინებოდნენ ძლიერი აფეთქებების შესახებ ღამით და დილით. მათი თქმით, საჰაერო თავდაცვამ ჩამოაგდო დრონები, რომლებიც მიფრინავდნენ ნავთობგადამამუშავებელი ქარხნისა და დიაგილევოს სამხედრო აეროდრომისკენ. ამის შესახებ კერძოდ წერს Astra. დიაგილევოზე თავდასხმებს ადასტურებს რუსი სამხედრო ბლოგერების ნაწილიც. კერძოდ, ტელეგრამის არხი Fighterbomber-ი წერს, რომ აეროდრომზე იერიში მიიტანა რამდენიმე დრონმა და რომ საჰაერო თავდაცვის სისტემა „ნორმალურად მუშაობდა“. იგივე არხი წერს, რომ ეს არის მესამე რუსული სამხედრო აეროდრომი, რომელსაც ბოლო დღეებში უპილოტო საფრენი აპარატები დაესხნენ თავს, მაგრამ არ ასახელებს კიდევ რომელ ორ აეროდრომზე განხორციელდა იერიშები, კერძოდ, იყო თუ არა მათ შორის აეროდრომი ოლენია. ...