ისრაელის უსაფრთხოების კაბინეტის წევრებმა პრემიერ-მინისტრს და თავდაცვის მინისტრს მიანიჭეს უფლებამოსილება, მიიღონ გადაწყვეტილება „ტერორისტული ორგანიზაცია ჰეზბოლას" წინააღმდეგ საპასუხო საშუალებების გამოყენების და ვადების შესახებ. კაბინეტის გადაწყვეტილება 28 ივლისს, ღამით გამოაქვეყნა პრემიერ-მინისტრ ბენიამინ ნეთანიაჰუს ოფისმა. ისრაელის მიერ კონტროლირებულ გოლანის მაღლობებზე თავდასხმის შემდეგ ნეთანიაჰუმ ვადაზე ადრე შეწყვიტა აშშ-ში ვიზიტი და ისრაელში დაბრუნდა. ისრაელის მონაცემებით, 27 ივლისს ქალაქ მაჯდალ შამსზე სარაკეტო შეტევის შედეგად სტადიონზე დაიღუპა 12 მოზარდი და ახალგაზრდა. გოლანის მაღლობებზე მდებარე ეს ქალაქი ძირითადად დასახლებულია არაბული ეთნოკონფესიური ჯგუფის წარმომადგენლებით - დრუზებით. ისრაელმა თავდასხმაში დაადანაშაულა ლიბანში მოქმედი რადიკალური დაჯგუფება ჰეზბოლა, რომელსაც მკაცრი პასუხით დაემუქრა. ჰეზბოლა სარაკეტო შეტევასთან კავშირს უარყოფს. ისრაელის არმიის ცნობით, 27 ივლისს, შუაღამისთვის ლიბანის ტერიტორიის სიღრმეში ჰეზბოლას ობიექტებზე ავიადარტყმები განახორციელეს. შედეგების შესახებ ჯერჯერობით არაფერი უთქვამთ. ასევე ნახეთ შეერთებული შტატები ისრაელს მხარდაჭერას უცხადებს გოლანზე თავდასხმისა და ბავშვების დაღუპვის შემდეგ ესკალაციამ ისრაელსა და ჰეზბოლას შორის შესაძლოა, ფართომასშტაბიანი ომი გამოიწვიოს. აშშ-ის ეროვნული უსაფრთხოების საბჭომ განაცხადა, რომ ისრაელსა და ლიბანთან მოლაპარაკებებს აწარმოებს. ირანმა ისრაელი გააფრთხილა, რომ ახალ სამხედრო „ავანტიურას" გაუთვალისწინებელი შედეგები მოჰყვება. გოლანის მაღლობები ისრაელის კონტროლქვეშაა 1967 წლიდან. მსოფლიოს ქვეყნების უმეტესობა გოლანის ანექსიას არ ცნობს და დე იურედ სირიის ტერიტორიად მიიჩნევს. ...