კვირას ჩრდილოეთ საფრანგეთში პოლიციამ დააკავა ულტრამემარცხენე აქტივისტი, რომელიც სარკინიგზო კომპანია SNCF-ის კუთვნილ ობიექტზე სავარაუდო დივერსიული აქტის მოწყობაშია ეჭვმიტანილი. ამის შესახებ ფრანგული მედია შინაგან საქმეთა მინისტრ ჟერარ დარმანინზე დაყრდნობით იუწყება. პოლიციის ცნობით, დაკავებულს ჰქონდა კომპანია SNCF-ის ტექნიკურ შენობაში შესასვლელი გასაღებები, მაშები და საკეტების გამღები მოწყობილობა, ასევე - პოლიტიკური ლიტერატურა. ჯერჯერობით არ არის ცნობილი, წაუყენეს თუ არა მას ბრალი ოფიციალურად. საფრანგეთის შინაგან საქმეთა მინისტრმა დაკავების ფაქტი დაადასტურა, თუმცა არ უთქვამს, უკავშირდებოდა თუ არა დაკავებულს ის დივერსიული აქტი, რომელიც რკინიგზაზე 26 ივლისის დილით, პარიზში ოლიმპიადის გახსნის დღეს მოხდა. დივერსიის შედეგად დაზიანდა პარიზიდან ჩრდილოეთის, დასავლეთისა და აღმოსავლეთის მიმართულებებით (ლილი-სტრასბურგი-ბორდო) მიმავალი მაღალსიჩქარიანი მატარებლების (TGV) ხაზები. ადგილობრივი მედიის ცნობით, თავიდან იქნა აცილებული ხანძარი კიდევ ერთ ხაზზე, რომელიც სამხრეთით ლიონისა და ხმელთაშუა ზღვის სანაპიროსკენ მიემართება. ეს ასობით ათას მგზავრს შეეხო. ოლიმპიადის გახსნის დღეს ბევრი მატარებელი რეისებზე არ გავიდა და სადგურებზე რიგები გაჩნდა. ორშაბათს რკინიგზელებმა ყველა მიმართულებით მოძრაობის აღდგენის შესახებ განაცხადეს. ხელისუფლებას ოფიციალურად არ წამოუყენებია ვერსიები იმის შესახებ, თუ ვინ დგას სარკინიგზო დივერსიების უკან. ფრანგული მედია წერდა, რომ ძირითად ვერსიად ულტრამემარცხენე აქტივისტების მონაწილეობას განიხილავენ. არ გამოირიცხება ასევე გარედან ჩარევაც. "რუსული კვალი" პირდაპირ ნახსენები არ ყოფილა. ორშაბათს ცნობილი გახდა საფრანგეთის სხვადასხვა რეგიონში სატელეკომუნიკაციო ობიექტებზე დივერსიების სერიის შესახებ. არსებული ინფორმაციით, დაზიანებულია საკაბელო სატელეფონო ხაზები. ჯერ არ არსებობს მონაცემები იმის შესახებ, შეიძლება თუ არა ეს თავდასხმები უკავშირდებოდეს რკინიგზაზე მომხდარ დივერსიას. ამ დღეებში საფრანგეთში რუსეთის მოქალაქე დააკავეს ოლიმპიადის დროს „დესტაბილიზაციის“ მომზადების ბრალდებით. ის ქვეყანაში 2010 წლიდან ცხოვრობდა და მზარეულად მუშაობდა. გამომძიებელი ჟურნალისტების თქმით, მისი ვინაობაა კირილ გრიაზნოვი. როგორც იუწყებიან, მან შემთხვევით ხალხს უთხრა, რომ ოლიმპიადაზე პროვოკაციების განსახორციელებლად მოლდოვის მოქალაქეები დაიქირავა. ასევე ნახეთ რუსი, რომელიც პარიზის ოლიმპიადის დროს დესტაბილიზაციის მცდელობაშია ეჭვმიტანილი, მზარეულად მუშაობდა ასევე ნახეთ საფრანგეთში დივერსიის შემდეგ კვლავ გაუშვებენ მატარებლების უმრავლესობას ...