ლიბანის დედაქალაქ ბეირუთის გარეუბანზე ისრაელის თავდასხმის შედეგად ერთი ქალი დაიღუპა და შვიდი დაშავდა, იტყობინება Reuters-ი ლიბანის უშიშროების ძალების მიერ გავრცელებულ ცნობაზე დაყრდნობით. ლიბანის შეიარაღებული გაერთიანების, ჰეზბოლას ოპერაციული ცენტრის ხელმძღვანელი მუჰსინ შუკრი 30 ივლისს გადაურჩა ბეირუთის სამხრეთ გარეუბანზე განხორციელებულ თავდასხმას, რომლის მიზანი მისი მოკვლა იყო, განუცხადა Reuters-ს უსაფრთხოების სამსახურის ორმა მაღალი რანგის წყარომ. AFP იმოწმებს ჰეზბოლასთან დაახლოებულ წყაროს და წერს, რომ სამიზნე იყო "წამყვანი მეთაური" და რომ დარტყმისას ორი პირი დაიღუპა, მაგრამ ვერ აზუსტებს, იყო თუ არა მათ შორის მეთაური. ისრაელის არმიაც იტყობინება, რომ დაარტყა ბეირუთის სამხრეთ გარეუბანს და რომ სამიზნე ჰეზბოლას ერთ-ერთი მეთაური იყო. ისრაელის არმიის თანახმად, დარტყმა განხორციელდა "მეთაურზე, რომელიც პასუხისმგებელია მაჯდალ-შამსში ბავშვების მეკვლეობასა და დამატებით ისრაელის მშვიდობიანი მოქალაქეების დაღუპვაზე”. ისრაელის არმიის მიერ ხსენებული დარტყმისას გოლანის მაღლობებზე მდებარე ქალაქ მაჯდალ-შამსზე, 13 ადამიანი, ძირითადად ბავშვები, დაიღუპა და 30 დაშავდა. ჰეზბოლამ უარყო მონაწილეობა ამ დარტყმაში. ისრაელისა და ლიბანის საზღვარზე ვითარება გაუარესდა შარშან, 7 ოქტომბერს, ისრაელზე ჰამასის (აშშ-სა და ევროკავშირში გამოცხადებულია ტერორისტულ ორგანიზაციად) თავდასხმის და ღაზის სექტორში საომარი მოქმედებების დაწყების შემდეგ. აშშ არ ფიქრობს, რომ ჰეზბოლასა და ისრაელს შორის ომი გარდაუვალია, - ამის შესახებ განაცხადა თეთრი სახლის სპიკერმა კარინ ჟან-პიერმა იმ ინფორმაციის ფონზე, რომ ისრაელის სამხედროებმა ბეირუთში მიზანმიმართული დარტყმა განახორციელეს ჰეზბოლას ერთ-ერთი მეთაურის მოკვლის მიზნით. ჰეზბოლა და ისრაელი დარტყმებს თითქმის ყოველდღიურად ახორციელებენ. ამავდროულად, ჯგუფმა განაცხადა, რომ ჯერ არ აწარმოებს ფართომასშტაბიან ომს ისრაელის წინააღმდეგ. შეერთებულმა შტატებმა და რიგმა სხვა ქვეყნებმა გამოთქვეს შიში, რომ ინციდენტები შეიძლება ასეთ ომში გადაიზარდოს. ასევე ნახეთ გოლანის მაღლობზე მდებარე ქალაქზე თავდასხმას 12 ადამიანი ემსხვერპლა - მათ შორის მოზარდები ...