ამერიკის ციხეების მონაცემთა ბაზიდან გაქრა შეერთებულ შტატებში დანაშაულებისთვის ნასამართლევი რამდენიმე რუსი. ეს მოხდა რუსეთის კოლონიებიდან ერთდროულად რამდენიმე პოლიტპატიმრის გაუჩინარების ფონზე. ამაზე ყურადღებას ამახვილებენ გამომძიებელი ჟურნალისტები. აშშ-ის მონაცემთა ბაზიდან გაქრა რუსეთის ძალოვანი სამინისტროების კონტრაქტორი ვლადისლავ კლიუშინი, აქციებით ინსაიდერული ვაჭრობისთვის მსჯავრდადებული ალექსანდრ ვინნიკი, კრიპტობირჟების მეშვეობით ოთხი მილიარდი დოლარის გათეთრებისთვის მსჯავრდადებული მაქსიმ მარჩენკო, რომელსაც რუსეთის წინააღმდეგ ამერიკის სანქციების გვერდის ავლაში ედება ბრალი, კიბერთაღლითი რომან სელეზნიოვი, რუსეთის სახელმწიფო დუმის დეპუტატ სელეზნიოვის ვაჟი და კიდევ რამდენიმე ადამიანი. კლიუშინს ადრე ახსენებდნენ აშშ-სა და რუსეთს შორის პატიმრების შესაძლო გაცვლის სავარაუდო მონაწილედ. აშშ-ის წამყვანი მედია იტყობინება შესაძლო გაცვლის შესახებ მოლაპარაკებების თაობაზე. ეს ინფორმაცია ოფიციალურად არ დადასტურებულა. ამერიკული ბაზიდან რუსების გაუჩინარება მოხდა რუსეთში კოლონიებიდან რამდენიმე ცნობილი პოლიტპატიმრის უცნობი მიმართულებით წაყვანის ფონზე. მათ შორის არიან ოპოზიციონერი ვლადიმირ კარა-მურზა, რომელსაც რუსეთის გარდა, აქვს ბრიტანეთის მოქალაქეობა და მუდმივი ბინადრობის ნებართვა შეერთებულ შტატებში, „მემორიალის“ ყოფილი თანათავმჯდომარე ოლეგ ორლოვი, ილია იაშინი, საშა სკოჩილენკო, ლილია ჩანიშევა, ქსენია ფადეევა, მარია პონომარენკო. გამოცემა „აგენტსტვო“ ყურადღებას ამახვილებს იმ ფაქტზე, რომ იმ რეგიონებიდან, სადაც იხდიდნენ ისინი სასჯელს, ბოლო დღეებში პრეზიდენტის საფრენოსნო რაზმ „როსიის“ რვა თვითმფრინავი აფრინდა. გამოცემა ამას ასევე უკავშირებს პატიმართა შესაძლო მასობრივ გაცვლას. შესაძლო გაცვლა არც რუსეთში დაუდასტურებია ვინმეს. თებერვალში რუსეთის პრეზიდენტმა ვლადიმირ პუტინმა ინტერვიუში გაცვლისთვის პოტენციური მზადყოფნა გამოხატა. მან მიანიშნა, რომ მზად არის, გერმანიაში სამუდამო პატიმრობაში მყოფი სავარაუდოდ ფსბ-ს ოფიცერი ვადიმ კრასიკოვი გაიცვალოს Wall Street Journal-ის ჟურნალისტ ევან გერშკოვიჩზე, რომელიც რუსეთში ჯაშუშობაშია ბრალდებული. კრასიკოვს ბრალი ედება რუსეთის სახელმწიფოს დავალებით 2019 წლის აგვისტოში ბერლინში ჩეჩენი საველე მეთაურის, საქართველოს მოქალაქე ზელიმხან ხანგოშვილის მკვლელობაში. შარშან სექტემბერში Wall Street Journal-მა დაწერა, რომ პუტინმა უშიშროების საბჭოს მაშინდელ მდივანს, ნიკოლაი პატრუშევს, დაავალა, იზრუნოს კრასიკოვის გათავისუფლებაზე. 19 ივლისს გერშკოვიჩს ეკატერინბურგის სასამართლომ 16 წლით თავისუფლების აღკვეთა მიუსაჯა ჯაშუშობის ბრალდებით. მოწმეების დაკითხვისა და მტკიცებულებების შესწავლისთვის სასამართლოს ერთი დღე დასჭირდა, რაც უჩვეულოდ მოკლე დროა რუსეთის სასამართლო სისტე...