უკრაინის არმიამ მიიღო F-16 გამანადგურებლების „მცირე“ რაოდენობა. ამის შესახებ Bloomberg-ი იუწყება ანონიმურ წყაროებზე დაყრდნობით. თუ ეს ინფორმაცია სიმართლეს შეესაბამება, მაშინ ეს არის ამერიკული გამანადგურებლების პირველი მიწოდება უკრაინისთვის. სააგენტოს წყაროები აღნიშნავენ, რომ უცნობია, უკრაინელი სამხედროები საბრძოლო მოქმედებებში თვითმფრინავების დაუყოვნებლივ გამოყენებას შეძლებენ თუ მოსამზადებელ პროცესს მეტი დრო დასჭირდება. კიევში კომენტარს არ აკეთებენ აღჭურვილობის შესაძლო გადაცემაზე. უკრაინის ხელისუფლება რუსეთის სრულმასშტაბიანი შეჭრის დაწყებიდან მოყოლებული ითხოვს დასავლური წარმოების მოიერიშე თვითმფრინავებს. 2023 წელს შეერთებული შტატების თანხმობით რამდენიმე ქვეყანამ გადაწყვიტა ასეთი თვითმფრინავების კიევისთვის გადაცემა, აღნიშნავს რადიო თავისუფლების უკრაინული სამსახური. მაისის ბოლოს უკრაინელი მფრინავების პირველმა ჯგუფმა დაასრულა შეერთებულ შტატებში გამანადგურებელ F-16-ზე წვრთნა. ისინი 2023 წლის ოქტომბრიდან გადიან წვრთნას არიზონის შტატში, 162-ე საჰაერო გვარდიის ბაზაზე. სკოლის დამთავრების შემდეგ პილოტები ევროპაში გაემგზავრნენ დამატებითი მომზადებისთვის. მარტში The New York Times-მა განაცხადა, რომ მიმდინარე წლის ივლისისთვის უკრაინამ შეიძლება მიიღოს ექვსი F-16, რისთვისაც მომზადდება 12 პილოტი. გარდა ამისა, საბრძოლო თვითმფრინავების მომსახურებისთვის 50-მდე უკრაინელი ტექნიკოსი გადის მომზადებას. General Dynamics F-16 იწარმოება მეოცე საუკუნის 70-იანი წლების შუა ხანებიდან. ის არის მეოთხე თაობის ერთ-ერთი ყველაზე პოპულარული გამანადგურებელი. იგი შექმნილია როგორც საჰაერო სამიზნეების დასაჭერად, ასევე სახმელეთო სამიზნეების გასანადგურებლად. თვითმფრინავები შეიარაღებაში ჰქონია 20-ზე მეტ ქვეყანას. 2023 წლის მონაცემებით, სხვადასხვა ქვეყნის საჰაერო ძალების შემადგენლობაში იყო 2100-ზე მეტი ასეთი თვითმფრინავი. ...