88
დასავლეთსა და რუსეთს შორის „პატიმართა დიდი გაცვლის“ ფარგლებში რუსეთის ციხეებიდან გათავისუფლებული პატიმრები რუსეთის პრეზიდენტმა შეიწყალა. ამის შესახებ კრემლის ოფიციალურ საიტზე გამოქვეყნებულ განცხადებაშია ნათქვამი: "რუსეთის პრეზიდენტმა ხელი მოაწერა დეკრეტებს, რომლებითაც აშშ-ის მოქალაქეები უილან პოლ ნიკოლასი, ევან გერშკოვიჩი და 11 სხვა პატიმარი შეიწყალეს. შესაბამისი განკარგულებების ხელმოწერის გადაწყვეტილება უცხო ქვეყნის ტერიტორიაზე მყოფი რუსეთის მოქალაქეების დაბრუნების მიზნით იქნა მიღებული." 1 აგვისტოს თურქეთის გავლით რუსეთმა აშშ-სა და დასავლეთს გადასცა ამერიკის მოქალაქეები, ჟურნალისტები ევან გერშკოვიჩი და ალსუ კურმაშევა, აშშ-ის ყოფილი საზღვაო ქვეითი პოლ უილანი, რუსი პოლიტიკოსი ვლადიმირ კარა-მურზა, რუსეთისა და გერმანიის მოქალაქე კევინ ლიკი, გერმანიის მოქალაქე პატრიკ შებელი, ასევე რუსი პოლიტპატიმრები ილია იაშინი, ლილია ჩანიშევა, ქსენია ფადეევა და ვადიმ ოსტანინი („ნავალნის შტაბის“ წევრები), „ღია რუსეთის“ ხელმძღვანელი ანდრეი პივოვაროვი, უფლებადამცველი ოლეგ ორლოვი, მხატვარი ალექსანდრა სკოლიჩენკო, პეტერბურგელი იურისტი გერმან მოიჟესი და პოლიტოლოგი დემური ვორონინი, რომელიც რუსეთისა და გერმანიის მოქალაქეა. ასევე ნახეთ ვინ არიან გაცვლილი პატიმრები? გასაცვლელ პატიმართა სიაში მოხვდა ასევე გერმანიის მოქალაქე რიკო კრიგერი, რომელიც შარშან ოქტომბერში ბელარუსის ხელისუფლებამ დააპატიმრა და სიკვდილით დასჯა მიუსაჯა. თეთრი სახლის მრჩეველმა აშშ-ის ეროვნული უსაფრთხოების საკითხებში, ჯეიკ სალივანმა, განაცხადა, რომ პატიმართა გაცვლაში მონაწილეობა უნდა მიეღო ასევე რუს ოპოზიციონერ ალექსეი ნავალნის, რომელიც საპატიმროში გარდაიცვალა. პოლიტიკოსის თანამოაზრეებმა გამოთქვეს ვერსია, რომ ნავალნი კრემლის ბრძანებით მოკლეს, რათა დასავლეთისთვის არ გაეცვალათ. კრემლთან დაახლოებული საინფორმაციო სააგენტოების ცნობით, 1 აგვისტოს „დიდი გაცვლის“ ფარგლებში რუსეთში დაბრუნდა რვა პატიმარი, რომლებიც სასჯელს იხდიდნენ სლოვენიაში, პოლონეთში, გერმანიაში, ნორვეგიასა და აშშ-ში. ესენი არიან ჯაშუშობისათვის მსჯავრდადებული არტიომ და ანა დულცევები (სლოვენია); "ეფესბეს" ოფიცერი ვადიმ კრასიკოვი, რომელიც გერმანიაში სამუდამო პატიმრობაში იმყოფებოდა ჩეჩნური წარმომავლობის საქართველოს მოქალაქის, ზელიმხან ხანგოშვილის მკვლელობისთვის; მიხაილ მიკუშინი, ჯაშუშობისთვის სასჯელს იხდიდა ნორვეგიაში; ჟურნალისტი პაველ რუბცოვი, პოლონეთიდან. ყველაზე მეტი, სამი პატიმარი, გათავისუფლდა აშშ-დან: ვადიმ კონოშჩენკოვი, ბრალი წაუყენეს "ეფესბეს" დავალებით ცნობების შეგროვებასა და ორმაგი დანიშნულების ტექნოლოგიების კონტრაბანდაში; ვლადისლავ კლიშინი და რომან სელეზნიოვი, რომლებიც სასჯელს იხდიდნენ კიბერთაღლითობისთვის....
