რუსეთის პრეზიდენტი ვლადიმირ პუტინი მოსკოვის ვნუკოვოს აეროპორტში დახვდა ამერიკის და ევროპის ქვეყნების საპატიმროებიდან გათავისუფლებულ რუსეთის მოქალაქეებს, მათ შორის ჩეჩენთა საველე მეთაურის, ზელიმხან ხანგოშვილის მკვლელობისთვის გერმანიაში გასამართლებულ ვადიმ კრასიკოვს. რუსეთმა და ამერიკის შეერთებულმა შტატებმა და გერმანიამ პატიმრები 1 აგვისტოს გაცვალეს. პუტინი გათავისუფლებულ რუსებს, რომლებიც მოსკოვში ანკარიდან წუხელ ჩაიყვანეს, თვითმფრინავის ტრაპთან დახვდა, „სახლში დაბრუნება მიულოცა“ და დაჰპირდა, რომ მალე ისევ შეხვდებიან და მათ მომავალზე ილაპარაკებენ. პუტინმა საგანგებოდ მიმართა მათ, ვისაც „პირდაპირი კავშირი აქვს სამხედრო სამსახურთან" და მადლობა გადაუხადა „ფიცის ერთგულებისთვის". კრემლის მიერ კონტროლირებულ სააგენტო „ტასს" მოჰყავს პუტინის სიტყვებიც, რომ დასავლეთის ციხეებიდან გათავისუფლებული ყველა მოქალაქე წარდგენილი იქნება სახელმწიფო ჯილდოზე. ასევე ნახეთ ვინ არიან გაცვლილი პატიმრები?  1 აგვისტოს, რუსი ოპოზიციონერების და აშშ-ის და გერმანიის მოქალაქეების, სულ 16 ადამიანის გათავისუფლების სანაცვლოდ რუსეთმა დაიბრუნა აშშ-ის და ევროპის ქვეყნების საპატიმროებში მყოფი 8 მოქალაქე, მათ შორის სპეცსამსახურების თანამშრომელი ვადიმ კრასიკოვი, რომელსაც გერმანიაში სამუდამო პატიმრობა ჰქონდა მისჯილი ზელიმხან ხანგოშვილის მკვლელობისთვის. საქართველოს მოქალაქე, ეთნიკურად ჩეჩენი ზელიმხან ხანგოშვილი, რომელიც ჩეჩნეთის მეორე ომში რუსეთის წინააღმდეგ იბრძოდა და მოსკოვის მიერ იძებნებოდა „ტერორიზმის" ბრალდებით, 2019 წლის 23 აგვისტოს ბერლინში მოკლეს. პოლიციამ იმავე დღეს დააკავა ეჭვმიტანილი, რომელსაც თან ჰქონდა ევროპაში გამგზავრებამდე ცოტა ხნით ადრე, ვინმე ვადიმ სოკოლოვის სახელზე გაცემული ყალბი რუსული პასპორტი. მოგვიანებით დადგინდა, რომ ეს პირი რუსეთის სპეცსამსახურების თანამშრომელი ვადიმ კრასიკოვია. 2021 წლის 15 დეკემბერს, ბერლინის სასამართლომ კრასიკოვს სამუდამო პატიმრობა მიუსაჯა. სასამართლომ დაადგინა, რომ დამნაშავე რუსეთის მთავრობის დაკვეთით მოქმედებდა და ზელიმხან ხანგოშვილის მკვლელობა იყო შურისძიება ჩეჩნეთის მეორე ომში მისი მონაწილეობის გამო. დასავლეთის მედიასაშუალებები 2023 წლიდან წერდნენ რუსეთის პრეზიდენტ პუტინის მცდელობებზე, კრასიკოვი პატიმრობიდან დაეხსნა. ასევე ნახეთ ზელიმხან ხანგოშვილის ქვრივი: "ადრე თუ გვიან, კრასიკოვს გაცვლიან. ეს პოლიტიკაა" გერმანიის კანცლერმა ოლაფ შოლცმა განაცხადა, რომ კრასიკოვის გათავისუფლება და რუსეთისთვის გადაცემა იოლი გადაწყვეტილება არ ყოფილა და ამ შემთხვევაში სახელმწიფომ უპირატესობა მიანიჭა არა სასჯელის აღსრულებას, არამედ რუსეთის ციხეებში უდანაშაულოდ მყოფი ადამიანების სიცოცხლეს და ჯანმრთელობას,...