გერმანიაში, “გერმანული ტალღის” ოფისში გაიმართა რუსეთსა და დასავლეთის ქვეყნებს შორის პატიმრების გაცვლის შედეგად 1 აგვისტოს რუსეთის კოლონიებიდან გათავისუფლებული რუსი პოლიტპატიმრების, ვლადიმირ კარა-მურზას, ილია იაშინისა და ანდრეი პივოვაროვის პრესკონფერენცია. პრესკონფერენცია გახსნა ანდრეი პივოვაროვმა, რომელმაც მადლობა გადაუხადა ყველას, ვინც ამ გაცვლაში იყო ჩართული. 16, მისი თქმით, არ იყო ბევრი, მაგრამ ეს ადამიანები ფაქტობრივად სიკვდილს გადაარჩინეს. პივოვაროვის თქმით, ამ სიაში რომ არ მოხვედრილიყო, დარწმუნებულია, გაცვლის ამბავს რომ შეიტყობდა, გაიხარებდა. ამიტომ მას სჯერა, რომ ის, ვინც მიიღებს ამ ინფორმაციას კოლონიებში, სადაც უამრავი უსამართლოდ დასჯილი ზის, რწმენას შეიძენს, რომ მათაც გაათავისუფლებენ. პივოვაროვმა მიმართა დასავლეთის საზოგადოებრიობას, რუსეთის ხალხს ხელი გაუწოდოს, დაეხმაროს. 42 წლის ანდრეი პივოვაროვი არის ყოფილი აღმასრულებელი დირექტორი ამჟამად უკვე გაუქმებული პროდემოკრატიული მოძრაობა „ღია რუსეთისა“, რომელიც შექმნა დევნილობაში მყოფმა ყოფილმა ნავთობის მაგნატმა მიხაილ ხოდორკოვსკიმ. 2022 წლის ივლისში პივოვაროვს ოთხი წლით პატიმრობა მიესაჯა „არასასურველი ორგანიზაციის“ ხელმძღვანელობისთვის. ვლადიმირ კარა-მურზამ გერმანიის დემოკრატიულობას და თავისუფლებას გაუსვა ხაზი, რომ ამ ქვეყნის მთავრობის ინიციატივით მოხდა გაცვლა და ტრადიცია გრძელდება, სწორედ გერმანიაში ჩავიდნენ პირველად საბჭოთა პერიოდის დისიდენტები სოლჟენიცინი და შარანსკი და შემდეგ უკვე ხოდორკოვსკი. ყველამ ვიცით, რომ გერმანიის მთავრობის გადაწყვეტილება ამ გაცვლასთან დაკავშირებით რთული გადაწყვეტილება იყო, თქვა მან, მაგრამ იოლი გადაწყვეტილება მხოლოდ დიქტატორებშია, დემოკრატიულ სისტემებში კი ადამიანის სიცოცხლეს სცემენ პატივს, თქვა კარა-მურზამ. გუშინ გადაარჩინეს 16 ადამიანი, არა მგონია, რომ ადამიანის სიცოცხლეზე უფრო მნიშვნელოვანი რამ არსებობდეს, თქვა მან. ერთმანეთში არ აგერიოთ პუტინის რეჟიმი და რუსეთი, მიმართა დამსწრეთ კარა-მურზამ, რომელმაც ასევე გაიხსენა ერთი საბჭოთა დისიდენტის ნათქვამი, რომ რუსეთში კანონით არც დაჭერა შეუძლიათ და არც გათავისუფლება. მისი თქმით, ჩვენ არ მოგვცეს სხვა პასპორტები, ჩაგვსხეს თვითმფრინავებში და გამოგვამგზავრეს, არ გვაქვს საბუთები წესრიგშიო. ოპოზიციონერ პოლიტიკოს ვლადიმირ კარა-მურზას 2023 წლის ივლისში სასამართლომ 25 წლით თავისუფლების აღკვეთა მიუსაჯა და დამნაშავედ ცნო არმიის შესახებ „ფეიკების“ გავრცელებაში, არასასურველ ორგანიზაციასთან თანამშრომლობასა და სახელმწიფო ღალატში. უფლებადამცველების თქმით, ეს იყო „ყველაზე ხანგრძლივი პატიმრობა, რაც კი ოდესმე მიუსჯიათ პუტინის კრიტიკისთვის“. შემდეგ ბონში გამართულ პრესკონფერენციაზე ისაუბრა ილია იაშინმა, რომელმაც მადლობა გადაუხადა გაცვლის ორგანიზატორ...