აზერბაიჯანელ ჟურნალისტს აფგან სადიგოვს, - რომელიც ცოტა ხნის წინ თბილისში დააკავეს, - აზერბაიჯანში ექსტრადიცია ემუქრება. თბილისში სამ აგვისტოს დააკავეს აზერბაიჯანელი ჟურნალისტი აფგან სადიგოვი, რომელიც ორიოდე კვირის წინ საქართველოდან თურქეთში არ გაუშვეს. ცოლის გავრცელებულ ვიდეოში ჩანს, რომ სამართალდამცავები ცენტრალურ თბილისში, ინგოროყვას ქუჩაზე ცოლ-შვილთან ერთად მყოფ სადიგოვს შკოდის მარკის ავტომობილში, სანომრე ნიშნებით UU-122-HU, სვამენ. რამდენიმე მათგანი სამოქალაქო ფორმაშია გამოწყობილი. ადგილზე იყვნენ სადიგოვების არასრულწლოვანი შვილებიც. „რატომ მიგყავთ?“ - ეკითხებიან ისინი პოლიციელებს. შინაგან საქმეთა სამინიტროს პრესცენტრის ცნობით, შსს-ის ცენტრალური კრიმინალური პოლიციის დეპარტამენტმა დააკავა „მუქარისა და გამოძალვის ფაქტზე აზერბაიჯანის რესპუბლიკის მიერ ძებნილი აზერბაიჯანის მოქალაქე მისი შემდგომი ექსტრადირების მიზნით“. შსს-ში ამბობენ, რომ „აღნიშნული პირი 2024 წლიდან მუქარისა და გამოძალვის ფაქტებზე გათვალისწინებული დანაშაულის ჩადენისთვის იძებნებოდა“. ასევე ნახეთ „თბილისი აღარ არის უსაფრთხო, არ ვიცი, რა მელის“ - აზერბაიჯანელი ჟურნალისტი დახმარებას ითხოვს აფგან სადიგოვი, აზერბაიჯანელი ჟურნალისტი, მედიაგამოცემა Azel.Tv-ის მთავარი რედაქტორი, საქართველოდან წასვლას ვერ ახერხებდა. უფრო ზუსტად, მისი თქმით, საზღვარზე უთხრეს, რომ საქართველოდან წასვლას მხოლოდ იმ შემთხვევაში შეძლებდა, თუკი გეზს ბაქოსკენ აიღებდა. აფგან სადიგოვი, რომელიც აზერბაიჯანში ორჯერ, ჯერ 2016 წელს და შემდეგ 2020 წელს დააპატიმრეს, თავს ყოფილ პოლიტპატიმრად მიიჩნევს, ამბობს, რომ დღესაც იდევნება თავისი საქმიანობის გამო და არც ის და არც მისი ოჯახი საქართველოში თავს უსაფრთხოდ აღარ გრძნობენ. აფგან სადიგოვი ცოლსა და ორ არასრულწლოვან შვილთან, 10 და 15 წლის გოგოებთან ერთად, საქართველოში შარშან, 24 დეკემბერს ჩამოვიდნენ. ბოლო შვიდი თვეა ოჯახი თბილისში ცხოვრობს. აზერბაიჯანელი ჟურნალისტი მანამდე, წელიწად-ნახევრით ადრეც იმყოფებოდა საქართველოში. „ილჰამ ალიევის ბრძანება აღსრულდა“, - დაწერა სადიგოვის ცოლმა მისი დაკავების შემდეგ. ორიოდე კვირის წინ აფგან სადიგოვი რადიო თავისუფლებას ეუბნებოდა, შიშობდა, რომ მიუხედავად იმისა, რომ ამ ეტაპზე, მის წინააღმდეგ აზერბაიჯანში არანაირი სისხლის სამართლის საქმე არაა აღძრული, შესაძლოა, აზერბაიჯანის ხელისუფლებამ „კვლავ შეკეროს საქმე“ და საქართველოს მისი გადაცემა მოსთხოვოს. ერთ-ერთი პირველი, ვინც აფგან სადიგოვის თბილისის საერთაშორისო აეროპორტში შეფერხების შესახებ ინფორმაცია გაავრცელა, აფგან მუხთარლი იყო. აფგან მუხთარლი აზერბაიჯანის ხელისუფლებისადმი კრიტიკულად განწყობილი ჟურნალისტია, რომელიც თბილისიდან 2017 წლის 29 მაისს გაუჩინარდა, 30 მაისს კი ცნობილი გახდა, რომ ის ა...