"ახლა დადგა ახალი ეტაპი უკრაინის შეიარაღებული ძალების საჰაერო ძალების განვითარებაში", - განაცხადა უკრაინის საჰაერო ძალების დღის აღსანიშნავ ღონისძიებაზე პრეზიდენტმა ზელენსკიმ, რომელმაც თავის სიტყვაში გაიხსენა ის ძალისხმევა, რომელიც წინ უძღოდა დასავლეთის საბრძოლო ავიაციის მიღებას. "ჩვენ ასობით შეხვედრა და მოლაპარაკება გავმართეთ ჩვენი ავიაციის შესაძლებლობების გასაძლიერებლად, ჩვენი საჰაერო თავდაცვის, ჩვენი თავდაცვის ძალების შესაძლებლობების გასაძლიერებლად. პასუხად ხშირად გვსმენია: შეუძლებელია! მაგრამ მიუხედავად ამისა, შესაძლებელი გავხადეთ... ახლა კი ეს მართლაც რეალობაა, რეალობა ჩვენს ცაზე - F-16 უკრაინაშია", - განაცხადა ვოლოდიმირ ზელენსკიმ. უკრაინის პრეზიდენტმა მადლობა გადაუხადა იმ პარტნიორ ქვეყნებს, რომლებმაც გაიზიარეს F-16-ის მოწოდებაზე უკრაინის მოთხოვნა. კერძოდ, დანიას, ნიდერლანდსა და აშშ-ს. ამავე დროს, ზელენსკის არ უთქვამს, ამჟამად რამდენი F-16-ია უკრაინაში, მაგრამ აღნიშნა, რომ საჰაერო ძალებმა უკვე დაიწყეს მათი გამოყენება უკრაინის სახელმწიფოსთვის. ივლისის ბოლოს ცნობილი გახდა, რომ უკრაინამ მიიღო ამერიკული გამანადგურებლების პირველი პარტია, „მცირე“ რაოდენობა, როგორც ამის შესახებ Bloomberg-ი იუწყებოდა ანონიმურ წყაროებზე დაყრდნობით. ასევე ნახეთ Bloomberg-ის თანახმად, უკრაინის არმიამ F-16-ების პირველი პარტია მიიღო უკრაინის ხელისუფლება რუსეთის სრულმასშტაბიანი შეჭრის დაწყებიდან ითხოვს დასავლური წარმოების მოიერიშე თვითმფრინავებს. 2023 წელს შეერთებული შტატების თანხმობით რამდენიმე ქვეყანამ გადაწყვიტა ასეთი თვითმფრინავების კიევისთვის გადაცემა, აღნიშნავს რადიო თავისუფლების უკრაინული სამსახური. მაისის ბოლოს, უკრაინელი მფრინავების პირველმა ჯგუფმა დაასრულა შეერთებულ შტატებში გამანადგურებელ F-16-ზე წვრთნა. ისინი 2023 წლის ოქტომბრიდან გადიან წვრთნას არიზონის შტატში, 162-ე საჰაერო გვარდიის ბაზაზე. სკოლის დამთავრების შემდეგ პილოტები ევროპაში გაემგზავრნენ დამატებითი მომზადებისთვის. ამერიკული გამანადგურებელი თვითმფრინავი (General Dynamics F-16) მეოცე საუკუნის 70-იანი წლების შუა ხანებიდან იწარმოება. ის არის მეოთხე თაობის ერთ-ერთი ყველაზე პოპულარული გამანადგურებელი, შექმნილი როგორც საჰაერო სამიზნეების დასაჭერად, ასევე სახმელეთო სამიზნეების გასანადგურებლად. თვითმფრინავები შეიარაღებაში ჰქონდა 20-ზე მეტ ქვეყანას. 2023 წლის მონაცემებით, სხვადასხვა ქვეყნის საჰაერო ძალების შემადგენლობაში იყო 2100-ზე მეტი ასეთი თვითმფრინავი. ასევე ნახეთ რას და როდის შეცვლის უკრაინის ცაზე ამერიკული „მებრძოლი შევარდნების“ გამოჩენა? ...