რუსეთის თავდაცვის სამინისტრომ არ მიანიჭა მოდერნიზებული ჯავშანმანქანების ახალ სერიას „ახმატმობილის“ სახელი, როგორც ამას ჩეჩნეთის მმართველი რამზან კადიროვი ითხოვდა. „კავკაზ.რეალიის“ ცნობით, ამის შესახებ რამზან კადიროვმა რუსეთის სახელმწიფო ტელეარხ „როსია 1-ის" ეთერში ილაპარაკა. პოლიტიკოსი ამტკიცებდა, რომ მან პირადად მიიღო მონაწილეობა ახალი მოდელის შემუშავებაში. სახელმწიფო კორპორაცია „როსტეხში“ შემავალი ურალის ქარხანა „რემდიზელის“ ბაზაზე ახალი ჯავშანმანქანების პროექტირებაზე მუშაობა 2022 წლის პირველ ნახევარში დაიწყო. მასზე მუშაობა, რამზან კადიროვის თქმით, საწარმოს გენერალურ კონსტრუქტორ იგორ ზახარევიჩთან ერთად, პირადად მისი რეზიდენციის ეზოში მდებარე ფანჩატურში მიმდინარეობდა. კადიროვის ამტკიცებს, რომ მისი იდეა ითვალისწინებდა მანამდე არსებული ჯავშანმანქანა "ტაიფუნისთვის" არა მხოლოდ სახელის შეცვლას, არამედ სრულ ცვლილებას. „მოვილაპარაკეთ, რომ მანქანებს „ახმატმობილს“ დავარქმევდით, მაგრამ თავდაცვის სამინისტრომ იეჭვიანა და შეეცადა სახელი მოეშორებინათ“, - განაცხადა კადიროვმა, რომელიც მიიჩნევს, რომ ასეთი გადაწყვეტილების მიღება „როსტეხის“ ხელმძღვანელს, ვლადიმირ პუტინის მეგობარ სერგეი ჩემეზოვს შეეძლო. რამზან კადიროვის მტკიცების მიუხედავად, ქარხანა „რემდიზელის“ გენერალურმა დირექტორმა ალექსანდრ ზახარევიჩმა მოდიფიკაციას უწოდა „უმნიშვნელო ცვლილება“, რომელიც ჯავშანმანქანის დამცავ სტრუქტურას შეეხო. 30 ივლისს სერგეი ჩემეზოვმა პუტინს მოახსენა, რომ ამ დროისთვის ქარხანამ დაახლოებით ათასი მოდიფიცირებული ჯავშანმანქანა გამოუშვა, ხოლო პირველი ათი მანქანა, ჩემეზოვის თანახმად, ჩეჩნურმა დანაყოფებმა საჩუქრად მიიღეს. ამავე დროს, 2022 წლის ივლისში, როდესაც ჩეჩნეთში პირველად აჩვენეს ჯავშანტექნიკა, რამზან კადიროვი აცხადებდა, რომ ისინი "სამხედროების საჭიროებებისთვის შეიძინეს." ჩეჩნეთის ხელმძღვანელის თქმით, ერთი მანქანის ღირებულება 17-18 მილიონ (დაახლოებით 260 ათასი აშშ დოლარი) რუბლს შეადგენს. ასევე ნახეთ რუსეთმა სპეცრაზმი „ახმატი“ გაგზავნა უკრაინის ხარკოვის ოლქის სასაზღვრო რაიონებში რუსეთი ჩეჩნეთში შექმნილ სპეცდანიშნულების რაზმ „ახმატს“ იყენებდა ე.წ. წმენდის ოპერაციისთვის უკრაინის სხვადასხვა რაიონში, მათ შორის დონეცკის ოლქის ქალაქ მარიუპოლში კრემლი „სპეციალურ სამხედრო ოპერაციას" უწოდებს უკრაინის წინააღმდეგ 2022 წლის 24 თებერვლიდან დაწყებულ ომს. ...