მოქალაქეები თბილისში, ვაშლიჯვრის დასახლებაში, ახალი მეწყრული კერის გააქტიურების შესახებ ინფორმაციას და დრონით გადაღებულ კადრებს ავრცელებენ. ადგილობრივების თქმით, იქ, სადაც მიწა დასკდა და ნაპრალები გაჩნდა, ბროწეულისა და იასამნის ქუჩების კვეთაზე სამშენებლო კომპანია "არქი" მრავალსართულიანი კორპუსის მშენებლობას გეგმავდა. ეჭვი ამ ტერიტორიის უსაფრთხოების შესახებ მას შემდეგ გაუჩნდათ, რაც კომპანიამ მოულოდნელად სამშენებლო სამუშაოები შეწყვიტა და ტერიტორიიდან ტექნიკა გაიყვანა. "უეცრად შეწყვიტეს სამუშაოები, როცა წვიმა და ქარი არ აღელვებდათ [მანამდე], გაიყვანეს ტექნიკა, [ადგილობრივებმა] დაინახეს, რომ უკან ზიდავდნენ მიწას, რასაც კამაზებით ეზიდებოდნენ გადასაყრელად....საეჭვოდ მივიჩნიეთ მაცხოვრებლებმა და დრონით გადავიღეთ ეს კადრები", - ამ ტექსტით გაავრცელა ადგილობრივმა 6 აგვისტოს დრონით გადაღებული კადრები ფეისბუკზე. დეველოპერულ კომპანია "არქის" თბილისის მერიიდან 2024 წლის აპრილში აქვს მიღებული ნებართვა ბროწეულის ქუჩის N5-ში 13-სართულიანი კორპუსის ასაშენებლად. "საპროექტო შენობა ჯამში 16- სართულისგან. აქედან 3 სართული არის პარკინგის, ხოლო დანარჩენ სართულებზე საცხოვრებელ ბინებს უკავიათ. ფასადები მოპირკეთდება ნაწილობრივ მაღალი ესთეტიური ღირებულების და ძლიერი ხანმედეგობის მქონე კომპაქტ ლამინატის (HPL) ფილებით, ნაწილობრივ გაილესება მიუნჰენური ლესვით. აგრეთვე აივნების ნაწილი მოპირკეთდება მაღალი ესთეტიური ღირებულების და ძლიერი ხანმედეგობის მქონე კომპაქტ ლამინატის (HPL) ფილებით, ნაწილობრივ გამოვიყენებთ ლითონის მილკვადრატის პროფილს. შენობის კონსტრუქცია რკინაბეტონის კარკასისაა, გარე კედლებისათვის გამოყენებულია იტონგის ბლოკი", - წერია ამ ნებართვის მისაღებად მერიის არქიტექტურის სამსახურში წარდგენილ განმარტებით ბარათში. მრავალბინიანი საცხოვრებელი სახლის ასაშენებლად 6 838 კვადრატული მეტრის მიწაა გამოყოფილი, მშენებლობის ვადად განსაზღვრულია 2024 წლის 26 აპრილი - 2028 წლის 26 აპრილი. სამშენებლო ნებართვისთვის თბილისის მერიაში წარდგენილ გეოლოგიურ დასკვნაში ნათქვამია, რომ ეს ტერიტორია, რომელიც კორპუსის მშენებლობისთვის არის განსაზღვრული, გეოლოგიურად მაღალი და საშუალო რისკის არეალებს აერთიანებს, თუმცა დოკუმენტის მომზადებისას იქ მეწყერი არ ფიქსირდებოდა. ფრაგმენტი საინჟინრო-გეოლოგიური კვლევიდან. დოკუმენტი კომპანია "გეოინჟინერკომპლექსის" მომზადებულია 2023 წელს. გეოლოგიურ დასკვნაში ლაპარაკია იმაზეც, რომ "ტერიტორიაზე ცალკეულ ადგილებში გამოიყოფა გეოლოგიური საშიშროების საშუალო და მაღალი რისკის არეალები, ასევე მოსალოდნელია ხევის მხრიდან ღვარცოფული ნაკადების მოქმედება". გეოლოგიურ დასკვნაში წერია, რომ ღვარცო...