რუსეთის ხელისუფლება კურსკის ოლქზე უკრაინის თავდაცვის ძალების მორიგი შეტევის შესახებ იუწყება. უკრაინის სუმის ოლქთან მოსაზღვრე კურსკის ოლქში, საიდანაც 6 აგვისტოს ვრცელდებოდა ცნობები სახმელეთო ბრძოლების შესახებაც, 7 აგვისტოს, შუაღამის შემდეგ, საჰაერო განგაში ორჯერ გამოცხადდა. ოლქის გუბერნატორ ალექსეი სმირნოვის მიერ ტელეგრამით გავრცელებული ცნობების მიხედვით, რუსმა სამხედროებმა საჰაერო თავდაცვის საშუალებებით ჩამოაგდეს ოთხი რაკეტა და სამი უპილოტო საფრენი აპარატი. რაც შეეხება სახმელეთო ბრძოლას, 6 აგვისტოს ჯერ გუბერნატორმა სმირნოვმა განაცხადა, რომ უკრაინის შეიარაღებული ძალები ცდილობენ კურსკის ოლქის სუჯანსკის და კორენევსკის რაიონებში შეღწევას, შემდეგ კი კრემლის მიერ კონტროლირებულმა სააგენტოებმა თავდაცვის სამინისტროზე დაყრდნობით გაავრცელეს ინფორმაცია, რომ კურსკის ოლქზე ჯავშანტექნიკის გამოყენებით „შეტევა სცადა“ უკრაინელების 300-წევრიანმა „დივერსიულმა ჯგუფმა“. ადგილობრივი დროით საღამოს რვა საათის შემდეგ, რუსეთის სახელმწიფო მედიით გავრცელდა თავდაცვის სამინისტროს განცხადება, რომ არტილერიით, ავიაციით და დრონებით დარტყმის შედეგად „დივერსიულ-სადაზვერვო ჯგუფმა დანაკარგებით უკან, თავის ტერიტორიაზე დაიხია“. თუმცა მალევე რუსეთის თავდაცვის სამინისტროს ტელეგრამ-არხზე გამოქვეყნდა ინფორმაცია, რომელშიც არაფერი იყო ნათქვამი „უკან დახევაზე“. რუსეთის თავდაცვის სამინისტრომ გაავრცელა ვიდეომასალაც, რომელიც, მისი ინფორმაციით, ასახავს უკრაინელების ჯავშანტექნიკის განადგურებას. ამერიკული ანალიტიკური ცენტრის, ომის შემსწავლელი ინსტიტუტის(ISW) თანახმად, გეოლოკაციურ კადრებზე მართლაც ჩანს სასაზღვრო რაიონში დაზიანებული და მიტოვებული ჯავშანტექნიკა, თუმცა ჯერჯერობით გაურკვეველია, ეს ტექნიკა უკრაინულია, რუსული თუ ორივე მხარის. 6 აგვისტოს როგორც უკრაინული, ისე რუსული მედიასაშუალებები და ტელეგრამ-არხები წერდნენ, რომ კურსკის ოლქში უკრაინელებმა, სულ მცირე, ექვსი რუსი სამხედრო დაატყვევეს. უკრაინის თავდაცვის სამინისტროს კურსკის ოლქზე სახმელეთო შეტევის შესახებ ჯერჯერობით არაფერი უთქვამს. რუსეთის ხელისუფლების თანახმად, 6 აგვისტოს უკრაინის მხრიდან კურსკის ოლქზე დარტყმების შედეგად დაიღუპა სამი და დაშავდა 18 სამოქალაქო პირი. სოციალური ქსელებით გავრცელდა ინფორმაცია კურსკის ოლქის სასაზღვრო რაიონებიდან მოსახლეობის ევაკუაციის შესახებ. რუსეთის საგანგებო სიტუაციების სამინისტროს კურსკის სამმართველომ ამ ცნობებს „ფეიკი" უწოდა და განაცხადა, რომ ევაკუაციის თაობაზე არანაირი ინფორმაცია არ გაუვრცელებია. ...