2008 წლის რუსეთ-საქართველოს ომის მე-16 წლისთავთან დაკავშირებით, დაღუპულთა ხსოვნის პატივსაცემად საქართველოს მთავრობის ადმინისტრაციის შენობაზე სახელმწიფო დროშა დღეს, 8 აგვისტოს, დაუშვეს. ადმინისტრაციის განცხადებაში წერია, რომ „მთავრობის განკარგულებით, საქართველოს აფხაზეთისა და ცხინვალის რეგიონების უკანონო ოკუპაციის მიზნით, რუსეთის ფედერაციის მიერ საქართველოში განხორციელებული ფართომასშტაბიანი სამხედრო ინტერვენციის შედეგად დაღუპული გმირების ხსოვნის პატივის მიგების ნიშნად, სახელმწიფო დროშები დაშვებულია ქვეყნის მასშტაბით ყველა ადმინისტრაციული ორგანოს შენობასა და საზღვარგარეთ საქართველოს დიპლომატიურ წარმომადგენლობებში“. საქართველოში რუსეთის შემოჭრის 16 წლისთავს საქართველოს მეგობარი ქვეყნები 7 აგვისტოს გამოეხმაურნენ. 2008 წლის აგვისტოს ომში დაღუპულთა ხსოვნას პრეზიდენტმა სალომე ზურაბიშვილმა 7 აგვისტოს მიაგო პატივი. ძმათა სასაფლაოზე 7 აგვისტოს იმყოფებოდნენ ოპოზიციური პარტიების ლიდერებიც. 7 აგვისტოს გამოქვეყნებულ განცხადებაში მმართველმა პარტიამ „ქართულმა ოცნებამ“ აქცენტი დასვა აგვისტოს ომში „ნაციონალური მოძრაობის“ პასუხისმგებლობაზე. ასევე ნახეთ ერთი ომის ორი თარიღი 2008 წლის 7 აგვისტოს, გამთენიისას, რუსეთის რეგულარულ სამხედრო ძალებს, რომლებსაც არ ჰქონდათ მშვიდობისმყოფელთა სტატუსი, საქართველოს ტერიტორიაზე უკვე დაწყებული ჰქონდათ სამხედრო იერიში. 2008 წლის აგვისტოს ომს საქართველოს 228 მშვიდობიანი მოქალაქე და 14 პოლიციელი შეეწირა. თავდაცვის სამინისტროს ბოლო მონაცემებით, დაღუპულად მიიჩნევა 169 სამხედრო. ომის დროს დაიჭრა 1747 ადამიანი. საკუთარი სახლი დატოვა თითქმის 150 000-მა პირმა, მათგან დღემდე დევნილობაში რჩება 30 000-მდე ადამიანი. 2008 წლის აგვისტოს ომის შედეგად საქართველომ კონტროლი დაკარგა 189 სოფელზე, მათგან 125 დღემდე ისევ საოკუპაციო რეჟიმის ქვეშაა. რუსეთმა საქართველოს ორი რეგიონის, ამჟამად ოკუპირებული აფხაზეთისა და ოკუპირებული ცხინვალის რეგიონის, ე.წ. დამოუკიდებლობა 2008 წლის აგვისტოს ომის შემდეგ ცნო. ...